Во присуство на поранешниот кошаркарски репрезентативец, Владо Илиевски, во „1ТВ“ првоосомничениот во случајот „Рекет“, Бојан Јовановски-Боки 13 побарал два милиона евра да го спаси Зоран Митровски, газда на „Бетон Штип“, од истрагата „Поштенска банка“ и други истраги во СЈО. Ова на денешното судско рочиште го тврдеше адвокатот Сашко Бошков, кој со првообвинетиот Бојан Јовановски, како што рече, се сретнал два пати. Тој е третиот на листата на сведоци на обвинителката Вилма Рускоска, Орце и Ана Камчеви.
„Првиот пат се сретнавме во февруари во 2018 година, кога по неуспешниот избор во кошаркарската федерација, побаравме медиумска поддршка. Тогаш уште не беше отворена телевизијата „1ТВ“, па не можеше да соработуваме. Втората средба беше во ноември, кога Боки му се јави на Владо Илиевски и го повикал во телевизијата. Кога отидовме, Боки ме праша дали се знам со Зоран Митровски, на што му одговорив дека ми е кум. Тогаш ме праша дали знам дека има неколку истраги во СЈО. Кога му реков дека е осомничен во „Поштенска Банка“, рече дека има уште неколку, уште четири. Ми рече дека може да помогне“ рече сведокот.
Тогаш, како што рече тој, Боки 13 го прекинал разговорот и се јавил на телефон.
„Не знам со кого зборуваше, но се слушаше женски глас. Зборуваше дека добра и била фризурата, убаво изгледала, а за предметите не спомна ништо. Тогаш заврши и рече дека може да помогне ама треба да се плати два милиона евра. Тогаш на штипски му реков, ти разбираш ли ги парите, и се насмеав“, рече адвокатот.
Тој рече дека тогаш тргнале да си одат, а во ходникот Боки 13 ги запознал со Лазар Јанев, синот на Катица Јанева. Како што рече сведокот, се мислел два-три дена дали да му каже на кумот Митровски.
„Се видов со Зоран, му кажав. Му реков да го пријави случајот. Првин се мислеше, а дури по извесен период пријави. Но, не по редовен пат, не во МВР и во Обвинителството“, рече сведокот.