УЈП: Последните три месеци се скенирани 29 милиони фискални сметки, исплатата на поврат на ДДВ во февруари

Управата за јавни приходи (УЈП) соопшти дека денеска се заокружува второто тримесечје од „МојДДВ“, мерка која се спроведува според Законот за враќање на дел од ДДВ кај физичките лица. Од почетокот на второто тримесечје кое стартуваше во октомври, заклучно со 30.12.2019 година скенирани се 28,948,878 милиони фискални сметки, остварен е промет од 14.301.474.854 милијарди денари, вкупениот ДДВ изнесува 1.554.510.671 милијарда денари, а повратот од 15 отсто е во износ од 233.176.601 милиони денари или 3.791.000 милиони евра.

Исплатата на повратот на ДДВ за второто тримесечје од оваа година ќе стартува во февруари. Притоа, од УЈП информираат дека за првото тримесечје од „МојДДВ“, за коешто исплатата започна во декември 2019 година, исплатен е поврат кај 144.601 граѓани кои во апликацијата „МојДДВ“ внеле валидни трансакциски сметки, во износ од 155.244.780.00 милиони денари.

За граѓаните кои во апликацијата „МојДДВ“ внеле погрешна трансакциска сметка и направиле корекција, информираат дека исплатата ќе се случи во понатамошниот период. Воедно, апелираат корисниците кои не внеле трансакциска сметка, тоа да го направат, по што ќе следува исплатата на повратот.