Втор ден траат протестите на „Пластичарска“ а тврдењата од ЕВН и оние на демонстрантите се спротиставени. Од ЕВН за НОВА велат дека се работи за дефект од преоптоварување на трафостаницата која го снабдува регионот со струја, додека жителите велат намерно е исклучена и страдаат поради неколку неплаќачи.
-Апелираме до граѓаните да се смират страстите и да ни се дозволи да го поправиме дефектот со цел да се регулира и соодветно да се користи електричната енергија, велат од ЕВН.
Според информациите, се случиле два помали инцидента, кога работници на ЕВН кои на терен не биле поради проблемот со трафостаницата, биле спречени од жителите а потоа со интервенција на полицијата ситуацијата се смирила. Таквите тврдења жителите кои „чуваат стража“ до трансформаторот ги отфрлаат и велат дека се измислици.
Како што соопштија од ЕВН за НОВА, другиот инцидент се случил изутринава околу 4 часот, кога еден од жителите влегол во трафостаницата мислејќи дека од ЕВН интервенирале, со што го довел во опасност и својот и животот на другите кои ја користат струјата во тој регион. И за овие тврдења жителите велат дека се лажни и дека се смислени со цел вината да им се префрли на нив а не на ЕВН.
На прашањето дали стравуваат од кривични пријави за оние кои крадат, и тужби за неплаќачите, како што наведоа од ЕВН, жителите велат подготвени се да одат на суд, бидејќи тие не направиле ништо противзаконско и дека проблемот „не лежи“ во нив.
„Дојдоа од ЕВН и рекоа дека требало да постават нов дигитален саат, и поставија, не сфаќаме во што е проблемот. Дезинформација е дека не дозволуваме да се направи трафостаницата и не се плашиме од кривични пријави. Нека дојдат во секое време“, изјави еден од штрајкувачите.
Тие бараат да се вклучи струјата а потоа институциите да ги преземат соодветните мерки, бидејќи вака народот измрзнува на ниските температури.
Воедно во зголемено присуство на полицијата, минатата вечер, како и изутринава сообраќајот се одвиваше многу тешко, Пластичарската улица и околните сообраќајници беа блокирани, по што возилата беа пренасочени во правец кон Кале или Железара.