Номинацијата на министерката за правда, Рената Дескоска, за член на Венецијанската комисија е прифатена. Таа ја потврди информацијаta на својот фејсбук профил.
„Денеска е прифатена мојата номинација за член на Венецијанската комисија. Тоа е и потврда дека се исполнети критериумите за членство во комисијата. Благодарам за довербата“, напиша министерката.
Претседателот на ВМРО-ДПМНЕ, Христијан Мицкоски, одговарајќи на новинарски прашања на прес-конференција рече дека номинацијата на Дескоска која датира од пред еден месец сама по себе е скандалозна.
„Ако го погледате членот 44 став 2 во законот за антикорупција, ќе видите дека тоа е недозволено и дека има сериозен конфликт помеѓу лице кое што е веќе избрано од страна на Владата или Собранието за да биде после од истата Влада предложено на друга функција. Замислете човек кој себеси се нарекува врвен европски познавач на правото, прави правен фаул за себе“, рече Мицкоски и ја повика Антикорупциска да дејствува по допрен глас.
Дескоска ја прифати фрлената ракавица, па и таа во изјава за медиумите ги повика антикорупционерите да поведат постапка и да се произнесат за случајот.
„Не постои конфликт на интереси бидејќи станува збор за ангажман во странство кој не потпаѓа под одредбата за забрана за вршење две функции, туку станува збор за претставување на земјата во комисија на Советот на Европа. И мојот случај не е единствен“, вели Дескоска, која на ова место ќе го замени досегашниот член, професорката Тања Каракамишева.
Земјите, според неа, што често праќаат закони на мислење до Венецијанската комисија избираат да номинираат за свои претставници министри, заменици министри или државни секретари, доколку истите ги исполнуваат условите, заради подиректна соработка со комисијата и целосна и искрена размена на ставови. Таков е, додава таа, примерот на Црна Гора која за свои претставници ги има министрите за правда и за надворешни работи, Србија чиј претставник е заменик министерот за правда, Романија, Унгарија, итн.