Македонија оваа година со нов свој адут на „Санден“, најголемиот американски фестивал на независен филм. Ако лани репрезент беше „Медена земја“, овојпат тоа е краткиот игран филм „Налепница“ по сценарио и режија на Георги М. Унковски.
Премиерата на филмот е денеска по што се закажани уште три проекции – на 25 јануари, на 28 јануари и на 30 јануари. „Налепница“ е селектиран во над 5.000 пријавени за оваа програма во која влегоа 74 наслови од 27 земји.
Документарецот „Медена земја“ на Тамара Котевска и Љубо Стефанов по трите освоени награди на „Санденс“ во 2019 година, оваа година стигна и до две номинации за Оскар.
„Во снимањето филмови најчесто се инспирирам од Македонија, од Скопје, градот кој има многу голем контраст во луѓето и во начинот на живеење, како и неверојатна бирократска машинерија. Така што, овој филм е микс на еден вид потрага по среќа и искупување, но е и еден вид социјален коментар на општеството. На крајот, филмот е за љубовта помеѓу татко и ќерка“, вели Унковски во видеото објавено на интернет страницата на Санденс.
Филмот „Налепница“ е во продукција на „Синема футура“ и се снимаше шест дена на повеќе локации низ Скопје. Главната улога му е доверена на Сашко Коцев, а во екипата се и Мони Дамевски, Џевдет Јашари, Љупчо Тодоровски-Упа, Соња Стамболџиоска, Димитрија Доксевски, Калина Димитриовска, Анастасија Аневска и Матеј Настевски.