Реагенсите за испитување на корона вирус кои беа порачани од Холандија пристигнаа во Институтот за јавно здравје, потврдија за НОВА во оваа институција. Вкупно 500 тестови за одредување на вирусот се ставени на располагање во случај и во Македонија да се појави сомнителен пациент. Пристигнати се и дополнитени бесплатни тестови од Институтот „Луј Пастер“ во Франција, со кои уште еднаш се контролираат евентуално потврдените позитивни случаи.
На Институтот велат дека со нив точно ќе може да се утврди дали кај некој сомнителен случај е присутен опасниот вирус кој од градот Вухан во Кина се прошири во многу држави во светот. Тоа значи дека материјал за тестирање на сомнителни случаи нема да има потреба да се праќа во лабораторија во странство.
„Само што пристигнаа реагенсите за корона вирус кои ги порачавме пред 10.тина денови од Холандија. Во Европа е многу голема побарувачката за овој вид на реагенси, а ние иако сме мала држава и баравме помала количина од останатите земји во ЕУ, сепак успеавме брзо да ги добиеме. Добивме и бесплатни тестови од Институтот „Луј Пастер“од Париз каде имаме соработка, со кои со сигурност може да се потврди дали е позитивен или не нашиот примерок, тоа е контрола на реагенсите “, изјави за НОВА, Шабан Мемети директор на Институтот за јавно здравје.
Започната е и постапка за набавка на маски и ракавици при евентуална појава на опасниот корона вирус бидејќи во државата ги нема во доволно количини.
„Државата е подготвена за корона вирусот, но количините на заштитна опрема се недоволни. Во процедура е постапка за дополнителна набавка на маски, ракавици, очила, заштитни мантили, се што е потребно за тоа. Препораките се јасни, да се избегнуваат контакти со луѓе кои имаат такви симптоми, да се мијат раце со сапун и вода“, изјави пред два дена Гордана Кузмановска, член на Комисијата за заразни болести.
Досега во државата нема ниту еден сомнителен случај за корона вирусот. Во Комисијата за заразни болести смируваат дека во рамките на своите можности државата е подготвена доколку се појават сомнителни случаи или заразени со корона вирус.
Покрај контролата со епидемилошка анкета и термо камерата на скопскиот аеродром, на Клиниката за инфективни болести има простор за изолација со 3-4 болнички соби. Овој изолиран дел од Инфективна клиника има посебен влез, каде што немаат контакт други пациенти или вработени. Со оглед на тоа што таму се кубури со медицински персонал, како и на повеќето клиники тоа сепак може да претставува проблем, посочуваат лекарски извори за НОВА.
Комисијата за заразни болести постојано одржува состаноци и ги следи препораките на СЗО. Сепак, збунува некоординираноста со министерот Филипче во делот на некои одлуки. Така на пример, министерот пред неколку дена изјави дека додека да стигнат реагенсите материјалите од евентуалните сомнителни случаи ќе се праќаат на испитување во Ниш, а претходниот ден Комисијата за заразни болести донела одлука тие да се праќаат на испитување во Берлин. Тоа создава забуна.
Инаку, пред три дена македонска државјанка со посредство на амбасадите на нашата држава во Пекинг и Париз, успешно беше евакуирана од кинескиот град Вухан. Засега нејзината здравствена состојба е добра, не постојат симптоми на корона вирусот, соопштија од МНР.
Постапката на евакуацијата била спроведена преку приклучување кон Програмата за евакуација на Франција која организираше специјален лет за своите граѓани што беа во ризичниот регион на Кина.
Пред да го продолжи патот за Македонија, таа во моментот заедно со останатите патници се наоѓа во карантин во траење од 14 дена во помал град на југот на Франција.
Засега таа е единствената која побарала помош од регионот на Вухан. Во МНР информираат дека во моментот во НР Кина легално престојуваат околу 100 наши државјани, а Дипломатското козуларно претставништво е во постојан контакт со нив.
Инаку, билансот на жртвите од смртоносниот вирус во Кина е 490 починати и околу 24.000 заразени од коронавирусот. Сите нови смртни случаи биле пријавени во провинцијата Хубеи, каде што се појави корона вирусот. Во провинцијата Хубеи и градот Вухан, милиони Кинези имаат забрана да го напуштаат регионот. Во светот, досега се регистрирани 175 случаи на заразени со коронавирусот.