Почнува исплатата од „МојДДВ“ за периодот октомври-декември во 2019 година со што на 197.819 граѓани ќе им бидат вратени 238.075.865 милиони денари или 3,871 милиони евра. Ова го соопшти директорката на Управата за јавни приходи (УЈП), Сања Лукаревска, која оцени дека мерката дава резултати, дека е популарна меѓу граѓаните и оти се бележи раст на наплата на ДДВ во периодот по нејзина примена.
Мерката „МојДДВ“ се применува од 1 јули лани. Апликацијата за скенирање фискални сметки, до 31 јануари оваа година, е преземена од 236.442 граѓани, скенирани се 66.885.228.000 милијарди фискални сметки со вкупен промет од 32.456.740.434 милијарди денари и вкупен ДДВ од 3.512.292.634 милијарди денари, а повратот од 15 отсто изнесува 526.843.896 милиони денари или 8,567 милиони евра.
Лукаревска рече дека, заклучно со 31 декември 2019 година, се исплатени пари на 147.251 граѓанин во вкупен износ од 157.780.662 милиони денари и додаде дека сè уште е во тек исплатата за првото тримесечие за оние граѓани кои имале грешки и направиле корекција на своите трансакциски сметки.
„На секој граѓанин кој скенирал фискални сметки му следува поврат на ДДВ што ќе го добие на својата трансакциска сметка, рече Лукаревска.
Таа потенцира дека мерката, покрај повратот на ДДВ кај граѓаните, ја исполнува и другата цел – намалување на сивата економија.
„Наплата на ДДВ е остварена во износ од 52 милијарди денари во 2019 година, што е за 5,7 проценти повеќе од остварениот износ во 2018 година кога наплата на ДДВ изнесуваше 49 милијарди денари. По воведувањето на „МојДДВ“, споредено со месеците јули-декември 2019 година со периодот јули-декември 2018 година, покажува зголемување во просек за 11,2 проценти, рече Лукаревска.
Оцени дека преку оваа мерка сме во одлична соработка со граѓаните кои редовно пријавуваат нерегуларности поврзани со неиздавање фискални сметки на линијата 198.
„Пријавувањето е зголемено, така што за неправилности од почетокот на оваа мерка имаме вкупно 1.687 пријави во однос на периодот јули-декември 2018 година кога имало 741 пријава“, рече Лукаревска.
Таа посочи дека во спроведените контроли констатирани се неправилности, како неиздавање фискални сметки, користење компјутерски сметки, непоседување на резервен фискален систем на опрема, како и непоседување и неевидентирање на податоци во книгата за дневен фиснансиски извештај и итна сметководствена книга.
Одговорајќи на новинарско прашање, Лукаревска рече дека УЈП направи контрола во фирмата поврзана со случајот на Лила Филиповска поради трансакцијата од 250.000 евра и дека кога ќе заврши целата постапка ќе соопштат детални информации.
„Во конкретната фирма која што беше поврзувана со конкретното физичко лице, спроведовме контрола токму поради таа трансакција. Исто така, странките беа кај нас на разговор, ни ја објаснија целата ситуација. За подетална информација ќе известиме штом заврши целата постапка“, рече Лукаревска.
Во врска со случајот со инспекторот во УЈП Тетово, кој беше приведен поради примање поткуп, рече дека станува збор за изолиран случај што не е честа појава во општеството.
„Очигледно дека станува збор за изолиран случај кој не е честа појава во општеството. Генерално, во УЈП, максимално сме посветени на транспарентно и законско работење на сите инспектори и даночни контролори. Сепак, секој инспектор си одговара сам за себе колку ги почитува законските одредби и колку ја злоупотребува својата службена должност. Му благодарам на обврзникот што се охрабрил да го пријави ова дејство. Понатаму ќе видиме како ќе се одвива целиот овој процес за инспекторот кој е поранешен управник на Регионалната дирекција-Тетово“, рече Лукаревска.