Откако се затвори Кликината за кожни болести и е најавено затворање на штипското кожно одделение, Филипче соопшти дека пациентите ќе се препраќаат во „8 Септември“. Но, одделот таму функционира само со една лекарка која не е во изолација и е единствена која не била на симпозиумот во саботата
Градската општа болница „8 Септември“, останува само со еден лекар на кожното одделение, другите четворица лекари од денес се во изолација бидејќи присуствувале на симпозиумот кој го водела директорката на Клиниката за кожни болести која е заразена со коронавирус. Министерот Филипче најави дека пациентите со кожни болести ќе се пренасочуваат таму, откако денеска е затворена клиниката, а најави затворање и кожното одделение во штипската болница. Сите 103 лекари што присуствувале на симпозиумот во саботата на 7 март кој се одржал во ресторанот Рагуза се во домашна изолација.
Во болницата „8 Септември“ за НОВА потврдија дека кожниот оддел сега ќе функционира амбулантски само со една лекарка и уште една која е на почеток на специјализација. Неофицијално, лекарката не отишла на симпозиум бидејќи имала смртен случај во семејството, починал татко и. Тоа практично значи дека и на неа и следуваат три работни дена да изостане од работа поради смртниот случај. Директорот Христијан Костов вели дека лекарките дошле утринава на работа, со маски, по што биле известени дека треба да си заминат дома во изолација.
„ Дојдоа утринава, со маски беа и потоа откако бевме известени со допис од ДСЗИ, заминаа во домашна изолација 14 дена. Остануваме само со еден лекар, а 10 хоспитализирани пациенти ќе бидат пуштени дома. Ќе бидат третирани само итните случаи амбулантски. Ќе се снаоѓаме некако, ќе гледаме да покриваме со дежурните интернисти“, изјави за НОВА, директорот Костов.
Тој кажа дека од пред една недела започнале со втора смена на Инфективното одделение, но и таму функционираат само со тројца лекари, од кои едниот е на боледување и пред пензија.
Денеска е затворена Клиниката за кожни болести и сите 64 вработени се ставени во изолација. Директорката Нина Цаца Билјановска пред 10 дена била на скијање во Италија, а со фотографии се пофалила и на социјалните мрежи. Таа цела недела била болна и така доаѓала на работа. Вработените ја пријавиле во Министертвото за здравство по што доцна синоќа и бил потврден коронавирус. Досега во изолација се ставени над 200 лица.