Најбрзо што може ќе биде решен проблемот со жените на кои им истекува породилното отсутво во овој период, најави министерот за здравство Венко Филипче.
Станува збор за мајки на кои им завршува породилното отсуство, а немаат каде да ги згрижат своите деца бидејќи не се запишани во градинка и немаат потврди од таму, особено вработените во МВР и во здравство кои пак, не можат да користат ниту платен ниту неплатен одмор. Филипче најави дека уште во текот на утрешниот ден ќе се донесат мерки за да се надмине овој проблем.
„ Го задолживме ФЗОРСМ да се вклучи во решавање на проблемот, тоа значи или ќе се продолжи породилното отсуство или ќе ги запишат децата во градинка формално сега, односно официјално“, изјави Филипче.
Стотици мајки кои основаа и фејсбук група „Мајки на трудничко“, кои не се во можност да одат на работа заради овој проблем во ситуација на вонредна состојба со коронавирусот се обраќаа до повеќе институции, но немаше решение на ваквата ситуација.
„Со оглед на сериозноста на пандемијата која го зафати светот и нашата земја, во услови кога градинките не работат, нема од каде да земеме потврди, ниту каде да ги оставиме нашите деца. Секаде каде што се обративме, не упатуваат во Владата“, изјавија за НОВА, повеќе мајки организирани во голема група Фејсбук, кои рекоа дека ќе достават допис и до Владата.
Министерот Филипче по ова прашање на НОВА, на денешната прес конференција вети дека уште утре ќе се најде решение на овој проблем.