Во ситуација на пандемија кога медицинскиот персонал е многу потребен, медицински лица работат по договор на дело без здравствено и пензиско осигурување и без решен статус за 15 000 денари месечно. Овие медицински лица од кои повеќето се со високо образование, од јули минатата година чекаат на трансформацијата на работниот однос што им ја ветија од Министерството за здрвство.
Во редакцијата на НОВА, се обратија медицински лица од болницата „8 Септември“, која е сега Центар за КОВИД-19. Тие велат дека се први на ударот, таму има вкупно 18 по договор на дело, 7 ренген техничари снимаат заболени пациенти и се директно изложени на ризик од зараза, има 9 физиотерапевти кои додека работат се во директен, близок контакт со пациентите, како и 2 лаборанти.
„Ние работиме во болницата од 2014/2015 година и во јули минатата година ни беше ветено трансформација на работниот однос. Баравме одговор кај раководството на болницата, од таму ни одговорија дека сме потребни, но дека се зависи од Министерството за здравство. Таму, пак ни рекоа дека Финансии треба да одобри средства. Во болницата имаат голема потреба од нас бидејќи кубурат со кадар, секојдневно си си извршуваме професионално нашите обврски, а сме изложени на ризик и ние и нашите најмили“, велат за НОВА медицинскиот персонал кои работат по договор за дело.
НОВА го праша министерот за здравство Венко Филипче дали ќе им биде решен статусот на овие лица.
„Ние во изминатите 2 години успеавме да го решиме прашањето на добар дел од нив, работниот однос се трансфомира од договор на дело во договор на неопределено време. Остана ставот сите што се во јавните здравствени установи да се вработат на неопределено време, меѓутоа се соочивме со предизвик на почетокот на годината и тоа не можеше да се реализира и покрај обезбедените средства. Сакам да повторам дека се работи на тоа, сите кои работат така, со оглас да се трансформираат со оглед на тоа што тие се дел од работниот процес и без добар дел од нив работниот процес практично и не може да се спроведе. Апсолутно остануваме на ставот, малку изборите не успорија, но тоа е ставот и политиката со која ќе продолжиме“, изјави Филипче.