Ништо не е сменето во ВРМО-ДПМНЕ, ако пред три години оваа партија од позиција на режим организираше насилен упад во Собранието кога беше извршен обид за убиство на пратеници, денес носители на пратенички листи од оваа партија јавно бранат насилници и се закануваат со нови насилства, велат од СДСМ на денот кога се одбележуваат три години насилниот упад во Собранието. Кошмарот чии слики експресно го обиколија светот кулминираше со насилство, луѓе со фантомки кои спроведуваат „ред“ во законодавниот дом, крвави глави, амбулантни возила, евакуација…
„Носителката на ВМРО-ДПМНЕ во шестата изборна единица, Дафина Стојаноска, инаку кадар на Никола Груевски застана јавно во одбрана на насилниците кои организирано упаднаа во Собранието и кои сакаа да убијат пратеници и новинари. Носителот во петтата изборна единица Игор Дурловски кој заедно со толпата влезе во Собранието, денеска, ги управува оние со кои упадна во Собранието и најавува нови битки“, потсетуваат социјалдемократите.
Ваквите ставови на високи претставници на ВМРО-ДПМНЕ, според нив, само покажуваат дека партијата предводена од Мицкоски не само што не се оградува од насилството од 27 април, туку напротив, тие ги слават насилниците и сакаат пак да го вратат насилството.
„И по три години од најцрниот датум за нашата демократија, ВМРО-ДПМНЕ останува во истата насилничка матрица и натаму шири омраза, поделби и конфликти. Граѓаните го препознаваат ваквото насилничко и деструктивно дејствување на ВМРО-ДПМНЕ и затоа никогаш повеќе нема да дозволат враќање на режимот кој со години ја имаше заробено државата“, велат од СДСМ.