Фондот за здравствено осигурување ја повлече донесената одлука за референтна цена од 3600 денари и донесе нова одлука со која новата цена на ПСР тестирање за КОВИД-19 ќе изнесува 1500 денари. Одлуката е донесена на Управен Одбор и во моментов се чека согласност од Министерот за здравство Венко Филипче, по што ќе биде објавена во Службен Весник, потврдија за НОВА од ФЗОРСМ.
Претходно, цената на ПСР тестовите изнесуваше 5500 денари, а во Фондот велат дека оваа цена била историска, дефинирана уште во 2013 година.
“Таа цена беше формирана пред избивање на пандемијата, во услови кога се вршеа мал број на тестови. Со избивање на пандемијата на КОВИД-19, стручните служби на Фондот, врз основа на анализа, ја ревидираа цената на здравствена услуга ПСР тестирање и беше денесена Одлука за нова цена од 3600 денари. Заради јавно достапните информации дека во приватните лаборатории оваа здравствена услуга се наплатува 1500 денари, Фондот ја повлече донесената одлука за цена од 3600 и донесе нова со која цената на ПСР тестирање за КОВИД-19 ќе биде 1500 денари“, велат во Фондот за здравствено осоигурување.
Од таму велат дека висината на цената на оваа лабораториска услугa која Фондот ја плаќа на сите здравствени установи со кои има склучено договор, е иста насекаде.
Во исто време, кога Фондот ја намали цената на ПСР тестовите во јавното здравство, приватните лаборатории драстично ги зголемија цените на овие тестови.
Иако започнаа со пониски цени, сега цените во приватните лаборатории се зголемија и ја достигнаа првичната цена која Фондот им ја плаќаше на Институтот за јавно здравје и другите јавни установи. Ова особено, откога Министерството за здравство ги призна како валидни тестовите на неколку лаборатории, за кои посочи дека нема потреба да се повторуваат уште еднаш во Институтот за јавно здравје.
Така на пример, цената во лабораторијата на Биотек, од 1500 денари во март, сега се зголеми на 3950 денари и е јавно достапна на нивната веб страна.
И во клиниката Жан Митрев, новата цена на ПРС тестовите е зголемена на 3950 од првичните 1500 денари, а од таму информираат дека одредувањето на новата цена се базира на новите трошоци и на ценовникот на услуги препорачан од Фондот за здравствено осигурување.
Во соопштението на новната веб страна стои дека комисија од Министерството за здравство извршила неколку увиди во целосната работа на лабораторијата при што конечен извештај бил доставен до Фондот.
“Во најбрзо време се очекува нашата лабораторија да почне да функционира во мрежата на здравствени услуги на РСМ’, се вели во информацијата на нивната веб страна.
Од Фондот пак, велат дека се уште немаат склучено договор со ниедна приватна лабораторија за тестирање на КОВИД-19 и немаат увид за висината на нивните цени.