Големиот шумски пожар што избувна синоќа околу 20:30 часот во планинската област кај Ореокастро, предградие на Солун, во голема мера е локализиран и повеќе нема активен фронт, информираат од грчката противпожарна служба.
Иако куќите беа успешно одбранети, огнената стихија која брзо се прошири од клисурата кон рамнината, целосно уништи два индустриски погони – фабрика за рециклирање и фабрика за текстил. Жителите на Солун во текот на ноќта можеа да го видат пламенот, но и да слушнат серија силни експлозии од запаливите материјали во индустриската зона.
Градоначалникот на солунската општина Неаполи-Сикис, Симос Даниилидис, упати сериозен апел до граѓаните строго да ги следат официјалните упатства за заштита. Тој предупреди дека над пошироката област на Солун се шири токсичен облак од чад.
Во индустриската зона има мазива, нафтени деривати, како и фабрика за рециклирање во која се складираат огромни количини пластика. Се слушаа континуирани експлозии во текот на ноќта, изјави Даниилидис за медиумите.
Воздушните сили ќе продолжат со дејствување и во текот на денот, со цел да се намали густиот црн чад и да се ограничи испуштањето на опасни супстанции во атмосферата.
Поради непосредната опасност, синоќа преку СМС пораки беше наложена итна евакуација на неколку локации:
Во извештаите се наведува дека нема настрадани граѓани. За време на интервенцијата повредени се четворица пожарникари – тројца поради респираторни проблеми од чадот, а еден поради ортопедски повреди.
Како главен осомничен за предизвикување на катастрофата е приведен 76-годишен маж. Според информациите од противпожарните служби на терен, при приведувањето мажот изгледал како да е под дејство на алкохол.
На терен во Ореокастро сè уште остануваат 160 пожарникари, 52 возила, 5 пешадиски екипи и воздушна поддршка. Пожарот моментално е изолиран во пошумена област, а екипите се фокусирани на континуирано ладење на жариштата околу двете изгорени фабрики за да се спречи повторно разгорување на огнот.