Ирска денеска го презема шестмесечното претседателство со Советот на Европската Унија од Кипар, за време на кое една од главните теми ќе биде буџетот за следниот седумгодишен период.
Ирска, членка на ЕУ од 1973 година, го презема претседателството со Советот по осми пат. Во својата програма, таа ги истакна економската конкурентност, безбедноста, проширувањето и континуираната поддршка за Украина како свои главни приоритети, а тука и се и Молдавија, Црна Гора и Албанија.
Македонија не и е на агендата.
Членовите на Европската комисија, предводени од претседателката Урсула фон дер Лајен, ќе бидат во Корк, Ирска, во четврток и петок, што е вообичаена практика на почетокот на секое ротирачко претседателство, кога членовите на Комисијата разговараат со членовите на владата на земјата претседавач.
Претседателот на Европскиот совет, Антонио Коста, денеска ќе присуствува на церемонија во Даблин по повод почетокот на претседателството со ЕУ и ќе разговара со ирскиот премиер Мајкл Мартин.
Ирска, како претседавач, ќе игра клучна улога во преговорите за следната Повеќегодишна финансиска рамка (МФФ), што ќе биде една од главните теми во втората половина од годината.
На самитот минатата недела, лидерите на ЕУ ја задолжија Ирска да подготви нова рамка за преговори за износите на МФФ и предлог за нови сопствени извори на финансирање за европскиот буџет до октомври.