Битката ја добивме, но војната се уште. Апелирам до граѓаните да се воздржат, мерките за заштита се уште важат, да нема поголеми групирања, да се држи дистанца и задолжително носење на маски. Институциите да интервенираат, да не дозволиме да пропадне се што досега сме направиле“, изјави министерот Филипче
Најголема опасност за ширење на вирусот се приватните собири и групирања. Новите случаи на заразени со коронавирусот најчесто се од семејни собири, но има и стари кластери, информира министерот за здравство Венко Филипче . Тој посочи дека 20-те заболени со КОВИД-19 се од семеен собир во скопската општина Чаир, но и предупреди дека следно ново жариште може да биде Тетово каде има и познати, стари кластери.
„Приватните собири и групирања се најголема опасност за ширење на вирусот. Последниот голем број на заболени се од Чаир, од приватен собир. Новозаболените се од Скопје и Тетово. Големи собири се забранети, граѓаните треба да го почитуваат тоа. Апелирам до граѓаните да се воздржат, мерките за заштита се уште важат, да нема поголеми групирања, да се држи дистанца и задолжително носење на маски. Институциите да интервенираат, да не дозволиме да пропадне се што досега сме направиле“, изјави министерот Филипче.
Иако не посочи за какви приватни настани се работи, на прашањето на НОВА, дали разговарал со поглаварот на ИВЗ, за да ги советува и влијае на граѓаните да внимаваат за време на Рамазанските пости, Филипче одговори дека тоа го сторил на првата средба пред да се отворат џамиите. Со оглед на ова јасно е дека кластерите се од семејни и приватни вечери, организирани за Ифтар.
НОВА, дознава дека минатата недела од таков семеен собир во општина Ченто исто така се заразиле дваеттина лица, роднински поврзани од три куќи во непосредна близина една на друга. Една од заболените е бремена жена која била хоспитализирана во ГОБ„ 8 Септември“.
Овој кластер е затворен, но експертите предупредуваат дека доколку вирусот се прошири на ваков начин, работата на епидемиолозите е завршена бидејќи тешко ќе биде да се утврди кој се, со кого контактирал.
Министерот посочи дека вирусот го има и ќе го има, но со разумно постапување и почитување на мерките ќе се одржи нивото. Комисијата за заразни болести ги анализирала сите аспекти засега смета дека епидемијата е под контрола.
„Зголемениот број на нови случаи е заради олабавување на мерките и движењето на граѓаните, што се воведува во сите земји. Дел од новозаболените се од приватни собири, дел се од стари кластери. Битката ја добивме но, војната не е добиена. Од сега со почитување на мерките ќе се држи вирусот под контрола. Економски мора да заживееме, тоа го прави целиот свет, но граѓаните мора да се свесни дека без нив не можеме, болниците не можат сами да ја водат битката“, посочи министерот Филипче.
Тој потенцира дека сите ги почитуваат мерките, следува стабилен период во однос на пандемијата, иако како што рече, свесен е дека има голем број граѓани кои не ги почитуваат мерките, а има такви кои ги почитуваат.
Во тој контекст, Комисијата за заразни болести утре ќе расправа за траењето на полицискиот час за време на викендот и празниците во понеделник. Овој викенд се преклопуваат двата празника, Денот на светите просветители св. Кирил и Методиј и муслиманскиот верски празник Бајрам. Ќе се разговара и за отворањето на угостителските објекти.
„Во текот на дискусијата ги имавме предвид и престојните празници за време на викендот, така што во текот на утрешниот ден ќе ја знаеме дефинитивната одлука согласно стручните препораки, како и отворањето на угостителските објекти што го најавивме во оваа недела“, рече Филипче.
Тој најави дека утре ќе се расправа и за следните чекори на олабавување на мерки за одредени субејкти и економски оператори, кои ги најавиле за крајот на оваа недела, како и за следните чекори за евентуално дополнително олабавување на превентивните мерки.
Министерот Филипче најави и дека се работи на протоколот за згрижување на децата во градинките и дека разменуваат детали Комисијата за заразни болести и тимот од Министерството за труд и социјална политика.
Одговарајќи на новинарско прашање кога се планира отворање на градинките, Филипче рече дека целиот процес ќе биде искоординиран со враќањето на родителите на работа.
„Некои детали разменуваат Комисијата за заразни болести и тимот од Министерството за труд и социјална политика. Верувам дека следната недела ќе заврши тестирањето на вработените и веднаш после тоа, меѓутоа тоа ќе биде и во согласност со одлуките да се вратат дел од луѓето на работа за да тоа биде еден координиран процес“. рече Филипче
На прашањето на НОВА, кога ќе започнат да фукционираат факултетите и дали ќе има испитна сесија во јуни за која студентите се подготвуваат, министерот одговори дека за ова прашање дополнитено ќе разговара со министерот за образование и дополнително ќе информира.
Тој потенцира дека се задоволни од динамиката со која се одвива скринингот во градинките, но и од резултатите. Во изминатите 24 часа се направени 533 тестирања за Ковид-19 од кои 203 во рамките на скринингот во градинките во Скопје и во Велес. Денешните тестови од скринингот се негативни.
Од 14 мај, досега, се направени 908 тестирања на вработени во градинките во Битола, Скопје и Велес и сите освен еден резултат се негативни. Во Битола е завршен скринингот и тестирани се 322 вработени меѓу кои е и едниот позитивен случај.
Тој најави дека продолжуваат со скринингот во другите ризични групи, вработените во домовите за стари лица, здравствени работници, хроничните болни пред интервенција и пациентите кои треба да почнат да примаат биолошка терапија, како и други групи граѓани за кои се смета дека спаѓаат во ризични категории врз основа на бројот на контакти кои го имаат во текот на денот.
На прес конференцијата министерот Филипче објасни дека и покрај тоа што се одлагаа закажаните операции, итните и неодложни операции се вршеле и досега се направени вкупно 1.800 операции(од 1 март до 1 мај )во три јавни здравствени установи во Скопје и тоа 1.190 во Хирушките клиники, 310 во ГОБ „8 Септември“ и 300 во Клиниката по хирушки болести „Св.Наум Охридски“.
Тој потсети и на одлуката на Владата за парична награда за сите здравствени и нездравствени работници кои беа и се уште се вклучени во работа со пациентите заболени од коронавирусот.
“Сите тие групи, доктори, медицински сестри, но и нездравствени работници, болничари, транспортери, возачите во сите ЈЗУ, како и во ИЈЗ, Службата за Итна медицинска помош ќе добијат награда од 20 проценти од основната плата за два месеца во сите јавни здравствени институции, болниците, институтите каде се правеа испитувањата, здравствените домови кои го организираа транспортот. Никој нема да биде изоставен, Сите се земени предвид“, рече Филипче.
Тој посочи дека начинот на исплата ќе биде со платежната картичка за што повеќе информации може да даде Министерството за финансии. Додаде дека на матичните лекари им бил зголемен бодот на 8о денари по пациент, така што сега нивните буџети се поголеми, затоа не се во оваа категорија кои ќе бидат наградени.