Секоја ноќ по 10 до 12 пациенти со Ковид-19 завршуваат во ГОБ„8 септември“. Така е цела седмица. Напливот од пациенти започнал во неделата, a дури еден ден биле хоспитализирани 17 пациенти, одеднаш. Центарот за Ковид-19 кој е распространет на шест одделенија и зафаќа 60 проценти од болничките капацитети е полн со пациeнти, потврди за НОВА, проф.д-р. Христијан Костов, директор на болницата.
„Напливот од пациенти започна одеднаш во неделата и еве цела недела имаме нови пациенти. Секоја вечер возилата на Итна медицинска помош ни носат по 10 -12 пациенти. Не знам што се случува, многу бргу завршуваат на респиратор“, изјави за НОВА, Костов.
Вчера таму имаше вкупно 34 пациенти, на респиратор 8, a со потешка клиничка слика уште седум пациенти, како и уште 15 суспектни кои чекаа потврда за брисеви.
Суспектни има и психијатриски пациенти, пациенти за операција со фрактури, кардиолошки случаи. Костов вели дека напливот на пациенти го одложил дури и селењето на Ценатарот во другиот дел на болницата, а со тоа и започнувањето со нормално функционирае на болницата за другите пациенти.
„ Таман одлучивме да го префрлиме Центарот за Ковид во другиот, изолиран дел на болницата започна и напливот на пациенти. Ќе мора да го одложиме селењето, додека се смири стуацијата“, рече Костов.
Тој вели дека медицинскиот персонал е преморен, особено на одделот за интензивна нега. Тие дежураат по 24 часа,по 4 часа се со целосна заштитна опрема, со скафандери, четири часа паузираат.
„Дојдоа 2-3 медицински сестри од Клиничкиот центар. Но, сепак вработените кои се постојано во битка за живот на луѓето, се многу изморени “, изјави директорот Костов.
Болницата во изминатите две години вработи 120 медицински сестри, токму поради недостаток од овој кадар. Осум одделенија беа затворени, а сега функционираат. Во болницата нема веќе медицински сестри кои работат по договор на дело, вели Косов, останати се само неколку лаборанти и физиотерапевти.
Од 10 март, од кога започна да функционира овој центар каде што е и тријажата, досега не е забележан толкав бран од нови пациенти.