Да се стопира приемот на нови пациенти со Ковид-19 во ГОБ„Септември“ затоа што веќе нема место место-оделенијата на петте спрата се преполни, а вработените се преморени и исцрпени, бараат од лекарите од болницата.
Таму во моментот има околу 150 пациенти со Ковид, а на одделите каде што се најтешко болните, каде се приклучени на респиратори и на маски со кислород ситуацијата е драматична.
Лекарите велат дека по четири месеци борба со вирусот, тие веќе се на крај на сили.
„Ситуацијата е критична. Треба да се стопира приемот на нови пациенти со Ковид-19. Сите сме на крај на сили, особено тие што сме во трите оддели каде што се најтешко болните, во шок соба, интензивна, во Ковид центарот.
Последен момент е да ни се најде соодветна замена за да одмориме малку, да пратат анестезиолози и обучени медицински сестри да не заменат“, велат за НОВА лекари од болницата.
Медицинските сестри дежураат по 24 часа, на секои четири дена, по две во смена. Четири часа се со заштитната опрема, скафандери, маски, наочари, неколку пара ракавици, а потоа наредните четири часа земаат здив, одмараат и се така 24 часа.
Тие ги покажуваат лузните по лицето од маските, дланките им се оштетени од долго носење на ракавици.
Лекари од болницата за НОВА тврдат дека во овие оддели сликата е очајна, медицински сестри паѓаат од умор, колабираат, повраќаат од премореност од работа. Анстезиолозите се изморени во битката со пандемијата без прекин четири месеци.
Двајца од анестезиолозите се позитивни на Ковид-19 и иако има три нови докторки анестезиолози сепак, велат дека не се издржува, преморени се и апелираат до надлежните да бидат заменети за да може да се одморат.
Дополнително и две анестетичарки исто така се позитивни на Ковид-19 , така што сега се само седум. Една група од нив дежура на секоја трета вечер.
Во Ковид центарот има 11 анестезиолози, кои велат дека исто како и тие во ГАК и детската болница во Козле , немаат право на одмор.
„ Медицинските сестри во одделите каде што се најтешко болните на респиратори, од умор паѓаат, колабираат, повраќаат. Преморени се дежураат по 24 часа на секоја четврта вечер.
Ние како анестезиолози реанимираме, аспирираме болни со секрет, помодрени ни ги праќаат од Инфективна клиника.
Преполно е со пациенти. Доаѓаат на нога и за два часа се менува клиничката слика, трчаме интервенираме, ги ставаме на респиратори“, раскажуваат лекарите со кои разговараше НОВА.
Лекарите велат дека во болницата има наплив од пациенти. Секоја вечер се примаат по 10-15 нови пациенти, возилата на Итната медицинска помош постојано носат нови случаи.
„Имаме 30 респиратори и доволно довод за кислород, но немаме доволни анестезиолози и медицински сестри.
Дојдоа неколку од други градови, но тешко се снаоѓаат- никогаш не биле во интензивна нега, не знаат каде што стои, тешко се вклопуваат, а некогаш секундите се во прашање“, велат лекарите.
Ситуацијата дополнително се усложнува заради интерхоспитална инфекција со Ацинетобактер. Велат дека нема кога да се исчистат машините, да се стерилизираат- што може да ја зголеми смртноста на и така тешко болните пациенти.
Министерот за здравство Венко Филипче за НОВА потврди дека денеска се разговарало за ова, да се направи ротација и дел од нив да одат на одмор.
„Да, денеска зборуваваме за ова. Сега имаат тројца нови примени анестезиолози, но ќе направиме и ротација. Планот е дел од нив да одат на одмор, а други да ги заменат“, рече министерот Филипче за НОВА.
Во ГОБ“ 8 Септември“ наплив на пациенти има особено откако тие почнаа да се препраќаат од Инфективна клиника, каде престанаа да ги ставаат на респиратор и таму сега се полесните случаи.
Пациентите во Ковид центарот во „8 Септември“се третираат со антивирусна и антибиотска терапија, при што задолжително се дава и анкоагулатна терапија заради опасноста од избивање на тромб, како во многу случаи досега. Поради тоа постојано се мери коагулациониот статус на болните.
„Има момент кога се знае која терапија кога треба да се дава. Оваа терапија се дава кога ќе настане циконската бура предизвикана од коронавирусот“, објаснуваат анестезиолозите.
Тие објаснуваат дека станува збор за непредвидлив тек на болеста, кога може да дојде и до откажување на бубрези и други органи, а белите дробови се разорени.
Поради сето ова ситуацијата станува неиздржлива и здравствените работници од „8 Септември“, која од 16 март е Ковид центар, апелираат до надлежните за побрзо решавање на проблемот, за да не дојде до непосакуваното, до колапс на болницата.