Пунктот за земање на брисеви за Ковид во Струмица ќе се затвори и дислоцира. Државниот санитарен и здравствен инспекторат издаде решение со кое му наложи на ЦЈЗ, пунктот веднаш да престане со работа и итно да бараат нов простор во склоп на јавна здравствена установа за да нема застој во земањето на брисеви, потврдија за НОВА од ДСЗИ.
„ДСЗИ издаде решение за забрана за работа на пунктот на Центарот за јавно здравје во Струмица за веднаш да престанат со работа и го задолжи директорот да го дислоцира и под итно да обезбеди соодветна просторија на ЈЗУ“, потврди за НОВА, д-р. Ирина Сотирова Бухова, директорка на ДСЗИ.
д-р. Ирина Сотирова Бухова, директорка на ДСЗИ
Како што објави НОВА единствениот пункт за земање на брисеви во Струмица се наоѓа на фрекфентна улица во близина на центарот, во станбена зграда и иако е со посебен влез, луѓето кои доаѓаат за брисеви стојат на тротоарот каде поминуваат многу луѓе.
Просторијата каде што се земаат брисеви е на општината, а внатре се вршат услуги за потребите на Центарот за јавно здравје. Реагираат станарите од зградата чиј влез е одалечен 4 метри од влезот на пунктот, но и соседите од околните куќи, како и таксистите.
Тие се уплашени и вознемирени бидејќи како што велат надор секојдневно чекаат луѓе за брисеви кои се потенцијални носители на вирусот. Особено што доаѓаат и пациенти за контролни брисеви, кои се позитивни на вирусот.
Станарите на зградата со број 39 на улица„Димитар Влахов“ кои се јавија во НОВА, се загрижени и бидејќи, како што велат, луѓето доаѓаат во контакт со пациентите кога поминуваат од тука, некогаш го грешат влезот, а често седат и на скалите во нивниот влез. Во близина е и католичката црква, а наскоро тука ќе поминуваат и ученици до четврто одделение за на училиште.
Станарите велат дека во зградата се претежно стари луѓе, хронично болни, а таму живее и девојка со еден бубрег за која велат е особено ризично ако дојде во контакт со вирусот. Тие бараат пунктот да се дислоцира бидејќи како што велат, преставува опасност не само за станарите и за околните куќи, туку и сите граѓани бидејќи е на фрекфентна улица. Во писмото наменето до надлежните веќе се потишани 40 граѓани, станари од зградата и околните куќи, како и таксистите.
Директорот на Здравствениот дом во Струмица, Петре Витанов кој е надлежен за Центарот за јавно здравје вели дека пунктот не преставува опасност за станарите ниту за граѓаните кои поминуваат од тука бидејќи луѓето што чекаат носат маски и ракавици. Но, смета дека е поризично доколку пунктот биде сместен во здравствена установа бидејќи пациентите што доаѓаат за брисеви може да го згрешат влезот и да се помешаат со другите пациенти.
По објавување на сторијата на НОВА, инспектори од ДСЗИ веднаш отидоа на терен, во пунктот, по што инспекторатот донесе одлука пунтот за се затвори и да се дислоцира.
