Падот од шест места на индексот за слободата на медиумите, односно 123-то место за Македонија според Репортери без граници, воопшто не е изненадувачки, коментираат долгогодишните новинари Ерол Ризаов и Александар Дамовски за НОВА.
Според Ризаов, 34-то место кое за претседателот Иванов во 2009 година не било прифатливо, односно претседателската агенда била со слободата на медиумите да се напредува и понатаму, сега се чини далеку позавидно, а вината за ваквиот пад ја наоѓа во окупацијата на власта на медиумскиот простор, надополнувајќи дека потребна е промена во односот на власта со медиумите како би се надминала сегашната ситуација.
И додека Македонија во однос на слободата, влегува во фразата „во тешка состојба“, останатите земји од регионот се неколку скалила погоре. Од непосредните соседи, Србија е 54-та (бележи напредок од 10 места), Косово е рангирано на 80-то место (напредок од 6 места), Албанија 85-та (напредок од 18 места).
Правејќи споредба со земјите од Балканот, главниот уредник на веб-порталот „Мкд.мк“, Александар Дамовски не е убеден дека во регионот се случува нешто поразлично од она што се случува во Македонија. Дамовски вели само неколку нијанси решаваат, потенцирајќи дека за излез од ваквото рангирање, потребно е обединување помеѓу уредниците, новинарите и другите медиумски работници, и да се почитуваат базичните принципи во новинарството, а воедно истото да се искажува преку телевизијата, порталите, текстовите и емисиите.
Одговорноста пак за да се поправи незавидната ситуација со слободата на медиумите во Македонија, новинарот Ризаов ја наоѓа во општеството, и вели власта и институциите на системот мора да градат добар и зрел амбиент за работа.
Инаку во денешниот извештај на Репортери без граници нотирано е дека во Македонија постојат бројни прекршувања на слободата на инфомации, а случајот Кежаровски стана симбол на ваквите прекршувања.
Исто така, нотирано е и апсењето на македонскиот новинар Зоран Божиновски.
>> Во слобода на медиуми од 117 Македонија падна на 123 место во светот
Имено, на листата оваа година, како и минатата, во поглед на медиумските слободи водат Финска, Холандија и Норвешка, а на дното се Туркменистан, Северна Кореја и Еритреја. САД бележат пад од 13 места и се 46-ти на листата.