Се зголемува бројот на заболени од грип. Нови 3156 заболени се регистрирани во последната недела, што во однос на минатата недела е зголемување од дури 34,3 проценти. Од 25 материјали кои биле донесени на испитување во последната недела,17 биле позитивни. Во вкупно 14 е откриен вирус од тип А, кај два е регистриран вирусот Н3N2, а еден е со грип од тип Н1N1. Нaјголем број на заболени се регистрирани во Кaвадарци и Скопје.
Во Институтот за јавно здравје потенцираат дека Македонија сега, во овој период забележан е најголемиот број на заболени во последните 10 години. Само во јануари има 6 801 новозаболени, што е 62, 2 проценти од вкупниот број на заболени во целата 2013/2014 година.
Од почетокот на сезоната до сега регистрирани се 10 934 заболени од грип. Како последица од компликациите од вирусот починаа три лица. Во последниот смртен случај кај 74 годишна жена, потврден е вирус од тип А. Во лабораторијата на Институтот досега се испитани 98 примероци за анализа, при што се покажало дека повеќе од половина се позитивни на вирусот на грип.
Епидемиолозите велат дека грипот е во пораст, а се очекува овој тренд да биде присутен и во наредните недели.
И во Европа доминира вирусот од тип А, иако е присутен и вирусот од тип Б. Најголемиот број на хоспитализирани случаи во болниците се деца до 4 годишна возраст. Пет земји пријавиле 124 смртни случаи сите поврзани со вирусот на грип од тип А.