Дилемата дали ќе се укинува Катедрата за македонски јазик и Катедрата за македонска книжевност изнесена од акадамик Коцарев е чиста измислица и опасна манипулација во во годината на чествувањето на 100-годишнината од раѓањето на нашиот патрон и професор – Блаже Конески, вели проф. др. Искра Пановска – Димкова.
-Во однос на тврдењата за укинување на Катедрата за македонски јазик, изнесени по медиумите од страна на претседателот на МАНУ, Љупчо Коцарев, сакам да укажам дека станува збор за чисти измислици, но и уште пострашно за опасни манипулации и инсинуации истовремено. За жал, тоа се случува токму во годината на чествувањето на 100-годишнината од раѓањето на нашиот патрон и професор – Блаже Конески.
Пановска – Димкова категорично тврди дека досега од ниту едно место до неа како раководител на Катедрата за македонски јазик, не допреле какви било „гласини” дека такво нешто се подготвува, дека Филолошкиот факултет „Блаже Конески“ никогаш не би завлегол во така реформа и бара од членовите на МАНУ да се оградат од претседателот на Академијата, Љупчо Коцарев.
– Имено, претседателот на МАНУ во својата изјава кажува тешки зборови кои не ги поткрепува со ниту еден каков било доказ, истовремено не посочува ниту една институција, а не пак лице кое евентуално би се зафатило со укинување на Катедрата за македонски јазик. Категорично тврдам дека досега од ниту едно место до мене како раководител на Катедрата за македонски јазик, не допреле какви било „гласини” дека такво нешто се подготвува од некаде. Во целост сум убедена дека Филолошкиот факултет „Блаже Конески“ никогаш не би завлегол во некоја таква реформа.
Во таа смисла, барам под итно членовите на МАНУ, како највисока академска институција, да се оградaт од ставовите на претседателoт на Академијата, Љупчо Коцарев, изнесени по медиумите.
Истовремено ја уверувам македонската јавност дека до колку некој поединец или институција би се дрзнале да чепнат во интегритетот на Катедрата за македонски јазик, ние сите до еден ќе се бориме тоа да го спречиме со сите средства и на сите начини, вели проф. др. Искра Пановска – Димкова.