Се чека одлуката по барањето на обвинителката Лиле Стефанова за продолжување на притворот на Орце Камчев во предметот „Плацови на Водно“ бидејќи на 14 април му истекуваат 30 – те дена од првиот.
Камчев заврши во притвор на 14 март откако белешка дека се подготвува за бегство до обвинителството достави Агенцијата за национална безбедност.
Од одбраната пак со став ќе поведат постапка пред Основниот кривичен суд во Скопје за утврдување на незаконитоста на белешката.
Адвокатот Тони Менкиновски тврди дека АНБ немала надлежност да го следи бизнисменот, бидејќи не станува збор за некаква закана по националната безбедност.
„АНБ постапила надвор од своите законски овластувања предвидени во Законот за Агенцијата за национална безбедност, овластувања кои се однесуваат на дела како шпионажа, тероризам и негово финансирање, насилен екстремизам и други активности поврзани со безбедносни закани и ризици за националната безбедност, додава Менкиновски.
Покрај постапката за незаконитоста на белешката, адвокатите на Камчев рекоа дека ќе поднесат и претставка до Судскиот совет за несовесно и нестручно работење на судијата по претходна постапка.