Премиерот Зоран Заев во врска со обвинувањата на опозицијата дека неговиот братучед Трајче Заев е вмешан во случајот со запленетата дрога во акцијата што во петокот ја спроведоа МВР и американската ДЕА, истакна дека пред законот сите се исто и доколку некој го прекршил ќе си одговара, без разлика со кого е близок, се дружел или пиел кафе.
Премиерот нагласи дека неговиот прв братучет Трајче Заев веќе ги демантирал информациите што опозиционерите ги пуштија во јавност.
– Впрочем, комбето има грчки регистарски таблички. Немам што да додадам, ниту да одземам, законот важи еднакво за сите. Александар може да дружи со мојот прв братучет колку сака, законот важи еднакво за сите. Или некој началник на полиција можел да биде на слика со соработник со Заев, со Спасовски, законот важи еднакво за сите. Заврши времето кога такви случаеви беа табу тема во нашата земја. Кој со кого сака нека е близок, дружел, пиел кафе заедно, го има на слики, ако го прекрши законот си одговара, порача Заев, по средбата со претседателите на опозициските албански политички партии, Алијанса за Албанците и Алтернатива, Зијадин Села и Африм Гаши.
Премиерот додаде дека за овој случај се изречени мерки од страна на Јавното обвинителство и на Судот, а следат судски процеси и согласно доказите и аргументите секој треба да си носи одговорност.