По пет години од почетокот на едно од најважните граѓански движења за демократија и правда, „Шарената револуција“,владините политики останаа доследни во почитувањето на барањата и заложбите, напиша премиерот Зоран Заев на својот фејсбук профил.
Според него „Шарена револуција“ предизвика огромни промени во македонската политичка и општествена реалност. Процеси кои потоа поминаа низ институционалната рамка откако претходеа реформи во правосудството, во изборниот законик, во медиумите и во јавната администрација.
– Таа беше јасниот и гласен изблик на граѓаните дека никој не може да им ја одземе слободата и да ги зароби општеството и државата и дека тие знаат да застанат во одбрана на овие вредности и да се спротивстават на брутален режим, додава Заев.
Тој пишува дека со јасно изразена политичка волја и низ реформите на правосудството беа поништени аболициите како спротивни на домашното право и кои беа извор на правна несигурност и на големо незадоволство кај граѓаните. Со нивното поништување воспоставена е нарушената правна рамнотежа.
– Прочистувањето е финалето на длабоките и суштински реформи во правосудството, а моделот за овој процес го подготвија и спроведуваат претставници на Судскиот совет, на Советот на јавни обвинители и со тоа му го дадоа потребниот кредибилитет на процесот и кој се спроведува вон допирот на политиката. Стигнавме до тука после тешка битка со противниците на правдата. Некои од нив останаа на браникот на криминалот – го гледаме тоа и ден денеска. Затоа беа против Законот за јавно обвинителство, вели претседателот на македонската Влада.
Додава дека како резултат на тој закон, предметите за висока корупција и организиран криминал се живи и тие добиваат и ќе добиваат судски разрешници. Наведува дека високи функционери, министри, веќе издржуваат затворски казни за тешки кривични дела. Од страна на Судскиот совет, истакнува, покренати се 80-тина предмети, а 9 судии се разрешени.
– Граѓаните здружени во #ШаренаРеволуција бараа ослободени институции и отворени институции и денеска никој не може да порекне дека оваа заложба не е остварена. Граѓаните денес се гласни и со конкретни критички ставови, а покрај себе имаат власт која е отворена за граѓанскиот глас, слуша и знае да се поправа. Тоа е резултат на демократската промена во чие остварување сериозен удел имаше и „Шарената револуција“, а граѓаните треба да се горди што Северна Македонија напредува на полето на демократијата и слободата. Авторското право на „Шарената револуција“ им припаѓа на сите граѓани и нејзината идеја и суштина треба да се пренесува од генерација во генерација. Пораката на ова граѓанско движење е жива и таква треба да остане засекогаш – никогаш да не се повтори една партиска „врхушка“ да им ги одземе на граѓаните слободата и општеството и правото на слободно изразување и критичка мисла, пишува Заев.