Портпаролот на претседателот на Европскиот Совет, Шарл Мишел, изјави дека не можат да потврдат постоење на нон-пејпер предаден од страна на словенечкиот премиер, Јанез Јанша како што јавија повеќе медиуми во регионот, а со кој се предвидува прекројување на границите на Западен Балкан односно за конечно заокружување на распадот на Југославија.
„Не можам да потврдам дека го добивме тој нон-пејпер, кусо одговори портпаролот на Мишел иако неколку часа претходно од прес-службите на Мишел стигна потврда за постоењето на нон-пејперот.
Претходно и портпаролот на Европската Комисија, Петер Стано, рече дека не се запознати со ваквиот документ и затоа не сака да ја коментира содржината за која слушнал како што рече од медиумските извештаи.
Наводите за содржината во овој фантомски нон-пејпер за „финализирање на распадот на поранешна Југославија“ се неверојатни – наводно во него станувало збор за мирна поделба на Босна и Херцеговина, но и на Македонија, Косово и Црна Гора.
Јанша ја демантираше оваа информација, а европратеничката од Словенија, Тања Фајон, изјави дека стратегијата на словенечкиот премиер може да доведе до „нова војна на Балканот“.
Словенија во втората половина од годинава треба да го преземе претседателство со ЕУ.
Босанските медиуми објавија дека поради овој наводен нон-пејпер била повикана амбасадорката Зорица Букинац.
Весникот 24ur.com од Словенија повикувајќи се на свои извори објави дека постои голема можност овој таен документ да постои, но дека е испратен целосно надвор од утврдените дипломатски канали.
– Нашите извори тврдат дека документот се однесува и на враќање во земјата на поранешниот премиер на Северна Македонија Никола Груевски“, пишува словенечката веб-страница.