Во Македонија засега нема присуство на бразилски и јужноафрикански сој на вирусот СарсКов 2, ова за Нова го потврдија од МАНУ, каде во Истражувачкиот центар за генетско инженерство и биотехнологија се врши скенирање и присуство на варијанти на вирусот Ковид 19. Анализите на МАНУ покажале дека доминатен сој кај нас е британскиот.
„МАНУ направи скенирање на 225 пациенти на присуство на варијанти, во период од 27 март до 5 април 2021 година и утврдено е дека во Македонија доминатен е британскиот сој на вирусот, со повеќе од 97% застапеност, што најверојатно е една од причина за драстично зголемување на бројот на новозаразени, како и оптоварување на здравствениот систем во последниот бран“ се вели во одговорот од МАНУ за НОВА.
Појавата на нови соеви на корона вирусот не се нешто неочекувано, а вакцините се единствениот спас од тоа, вели за НОВА, претседателката на Комитетот за имунизација, професорката Александра Грозданова.
-Очекувани се мутации на постоечките вируси, засега податоците што ги имаме ветуваат дека постоечките вакцини ќе обезбедат заштита и кон новите варијанти на вирусот СарсКов2 – вели проф. д-р Александра Грозданова за НОВА.
Според последните анализи на Институтот за јавно здравје,во последните 7 дена регистрирани сe 6.867 нови позитивни случаи од 35 градови во државата со намалување од 13,4% во однос на минатата недела.
Од друга страна, останува притисокот врз болниците велат од Министерството за здравство. Министерот за здравство, д-р Венко Филипче, информираше дека на утринскиот состанок со директорите на Клиниките размениле информации за состојбите во болниците.
„Ситуацијата е сериозна и во овој момент имаме благо зголемување на притисокот врз ковид центрите, односно во текот на вчерашниот ден имало поголем број на нови хоспитализаци. Мерките даваат резултат, но потребно е максимално придржување до истите за да го надминеме и овој епидемиолошки бран“ информираше Филипче.