Петтиот пакет економски мерки кои треба да го помогнат стопанството и граѓаните зафатени од кризата што ја предизвика пандемијата од корона вирусот, а кои денеска беа изгласани во Комисијата за финансирање и буџет, сепак ќе почекаат, утре продолжува расправата по Националната стратегија за спречување на корупцијата и судирот на интереси за периодот 2021-2025.
Ова е заклучокот од попладневната координативната средба кај претседателот на законодавниот дом Талат Џафери на која присуствувале координаторите на пратеничките групи на СДСМ, ДУИ, ВМРО – ДПМНЕ и претставник на политичката партија Левица.
Џафери ја свика координативна средба во насока на деблокирање на целокупната работа на Собранието, вклучително и на работните тела, со оглед на тоа што работата на дел од матичните работи тела е закочена повеќе од пет месеци.
„Работата на Собранието треба да се деблокира на секое ниво и сите политички партии треба да ја напуштат праксата на заложништво на процесот на усвојување закони, немање кворум заради оправдани здравствени причини на пратеници поврзани со ковид-19 пандемијата, или поднесување на огромен број амандмани по еден закон, оптоварувајќи ја и службата на Собранието, а не само законодавниот процес, се наведува во соопштението од кабинетот на Талат Џафери.
По повлекувањето на многубројните амандмани поднесени од дел од опозицијата, собраниската Комисија за финансирање и буџет денеска ги прифати законските решенија од петтиот пакет антикризни мерки.
Од Собранието засега нема информација кога ќе бидат одржани седниците на кои треба да бидат усвоени овие законски решенија од петтиот пакет антикризни мерки.