Поради секојдневните менувања на одлуките на државите туристичките агенции трпат огромни загуби. Велат дека бележат пад во прометот од 80 до 100 отсто, бидејќи како што истакнуваат интересот за патување е сведен на минимум, а реализацијата на направените аранжмани е неизвесна…
– 2021 година беше годината кога сите се надеваме дека ќе се вратиме во нормала меѓутоа за жал истата се покажа дури и полоша од претходната. Континуирана помош од страна на државата нема. Гледаме што се случува со петтиот пакет мерки и тоа не можеме да го поднесеме, изјави денеска на прес-конференција Ана Марија Алексова од Туристичко-угостителската комора.
Туристичките агенции бараат итна неповратна помош од Владата и ваучерите од кампањата „Дома си е дома“ да бидат задолжително искористени преку туристичките агенции. Бараат да се смени и одлуката за ваучерите за нереализираните патувања поради ковид кризата, односно наместо до 31 декември годинава, важноста на овие ваучери да се продолжи до 31 декември 2022 година.
Во моментов понуди има само за Албанија, додека за Турција каде засега се бара ПЦР тест, ситуацијата е неизвесна бидејќи одлуките се менуваат секојдневно, велат од туристичко – угостителската комора.