Откако неодамна во јавноста, група граѓани, жители на Градски Ѕид, најавија тужба пред судот во Стразбур за најавената градба на комплексот спроти Холидеј Ин, НОВА се обрати до адвокат д-р Костадин Богданов кој работи во граѓанско-правна област, а веќе 10 години е именуван Владин застапник пред Европскиот суд за човекови права во Стразбур.
Тој појасни дека не е можно поднесување на таква тужба директно во Стразбур, ако претходно не се завршени правните постапки во земјата.
Богданов, кој за најавената тужба се информирал преку медиумите, вели дека со оглед на тоа дека е дојдено до фаза на плаќање на комуналии за уредување на просторот, а административната постапка е веќе пред крај односно пред почеток со реализација на градбата, секое понатамошно одолговлекување или “кочење” на инвеститорот да отпочне со градба, многу повеќе отвора можност и дава основ инвеститорот да поведе успешна постапка пред ЕСЧП, отколку жителите и граѓаните кои се засегнати со овие градби.
„Најнапред, треба да се има предвид дека ЕСЧП не одлучува по т.н. actio popularis тужби, во кои е оспорен некој општ акт или одредба од општ карактер на некоја држава членка. ЕСЧП одлучува и ги штити само актуелните, индивидуални повреди на правата, кои се случиле или се случуваат, и тоа само на оние права кои се опфатени со заштита од Конвенцијата. Низ судската пракса на ЕСЧП, може да се најдат предмети во кои како тема била наметната животната средина или екологијата, и во кои жалителите тврделе дека со изградбата на некој објект им биле повредени некои права, но најчесто во тие предмети станувало збор за изградба на објекти од тешка индустрија, рудници, депонии и слично, или објекти чие работење предизвикувала неподнослива бука и галама, или со еден збор објекти кои го влошувале или влошиле во доволна мера здравјето на апликантите или основните услови за живот околу тие објекти.“ – објаснува Богданов.
Тој вели дека ќе биде извондредно тешко да се покаже нешто такво на сé уште неизграден објект, дотолку повеќе што во конкретниот случај станува збор за објект со комерцијални намени и домување.
„Секогаш постои опција да се нападне и процедурата, но за такво нешто е неопходно да се искористат домашните правни лекови во таа насока, и најчесто рокот се врзува и почнува да тече од конечноста на искористените правни лекови пред домашните органи.“ – заклучува Богданов.
Инаку, проектот Гранд Скопје кој беше презентиран минатата недела ја разбранува јавноста, а драстично ги спротивстави ставовите на жителите од Градски Ѕид и жителите на Ново Маало, кои деновиве масовно собираат потписи за „контра“ петиција на своите соседи од кулите во Градски Ѕид. Во неколку дописи до медиумите, ново маалчани изразија огромен револт кон институциите, организациите и граѓаните кои повикуваат на суспензија на планот.
„Крајно сме револтирани од предлозите за суспензија на планот и притисокот за ова кој го прават луѓе кои живеат во удобни домови, наспроти жителите на Ново Маало кои со децении живеат во услови кои ни одблиску не наликуваат на хумано домување. Доколку дојде до таква постапка, подготвени сме да излеземе на протест, да ја блокираме работата на Општина Центар, секако на цивилизиран начин, како и да поднесеме тужба до надлежните органи за претрпена штета од 1930 до 2021 година, но и до Стразбур.“ – наведоа ново маалчани утрово во допис до медиумите во кој информираа дека за само еден се собрани 250 потписи на петицијата од жителите на ова маало, која ќе биде доставена до Општина Центар и Владата.