Основното јавно обвинителството за гонење на организиран криминал и корупција извршило претрес во простории на Правниот факултет, а преку соопштение објави дека одземени се неколку компјутери, но не се пронајдени материјали за испити за идните судии и обвинители, како и дека софтверот за приемни испити на Академијата за судии и обвинители не е одземен.
Според информациите биле претресени простории кои ги користел Даниел Станчев, управител на „Инвока гроуп“, фирма преку која, како што беше објавено изминатиот период, бил набавен и софтверот за тестирање на кандидати за Академијата за судии и јавни обвинители.
Преку „Инвока гроуп“ е направена и спорната набавка на софтверот за сообраќајни прекршоци. За овој случај потоа беше отворена предистрага, а на 15 април и истрага, а Рашковски, Станчев како дел од осомничените се наоѓаат во притвор.
Тие првично добија куќен притвор од судијата на претходна постапка, но обвинителството поднесе жалба по што Кривичниот совет ја прифати и им ја преиначи мерката од куќен во ефективен притвор.
Во истрагата се осомничени уште две лица, меѓу кои е и хонорарец во Владата, на чија фирма се води џипот кој го вози Рашковски.
Истрагата опфаќа три тендери, сите поврзани со софтверот. Според Обвинителството, Рашковски со еден од останатите осомничени ја договорил набавката на софтверот доставувајќи сопствен патент за кој дал насоки да се изготви техничката документација за јавната набавка.
Покрај овој тендер, според Обвинителството, летото 2019 Рашковски донел уште две одлуки за јавна набавка за работи потребни за софтверот, иако во тоа време сè уште не бил склучен договор за негова набавка.