– ВМРО-ДПМНЕ сериозно размислува да формира неколку пратенички групи и така да настапува во Собранието, наместо со една составена од 44 пратеници, најави партискиот лидер Христијан Мицкоски коментирајќи ги потезите на спикерот Талат Џафери, кои, според него, се дивеење во Собранието.
Тој додава дека ВМРО-ДПМНЕ ќе се спротивстави на ваквото однесување на Џафери со сите демократски алатки што стојат на располагање.
– Доколку ова продолжи, сериозно размислуваме за повеќе пратенички групи во парламентот и негово целосно блокирање. ВМРО-ДПМНЕ ќе ги искористи сите можности за да го спречи ова негово дивеење во парламентот под менторство на Зоран Заев“, рече Мицкоски.
На почетокот на минатиот собраниски состав ВМРО-ДПМНЕ проба да функционира со 10 пратенички групи, но тој концепт не даде ефекти, меѓу другото, и поради тогашниот опозициски бојкот кон Џафери, што значеше неприсуство на координациите во парламентот. Набрзо по доаѓањето на Мицкоски на чело на ВМРО-ДПМНЕ, пратениците од опозициската коалиција повторно се собраа во една пратеничка група откако функционирањето во 10 табори беше оневозможено и поради приклонувањето на десетина пратеници кон владејачкиот камп.