Ниту еден од глувите лица кои беа избрани на огласот преку „Македонски шуми“ не е викнат на работа, тврдат за НОВА дел од лицата кои се наоѓаат на списокот на среќници.
Станува збор за четириесет глуви луѓе кои беа избрани на огласот за вработување преку Македонски шуми, а тие се дел од вкупно 300 луѓе со посебни потреби кои добија ветување за работа од Владата. НОВА стапи во контакт со голем дел од нив и од сите добивме одговор дека еден месец откако биле избрани на конкурсот се уште не се сигурни дали ќе бидат викнати на работа и каде ќе бидат распоредени.
-Се јавивме кај директорот тука за да прашаме зошто не сум викната на работа бидејќи рокот за жалби помина. Од таму добивме одговор да се стрпиме бидејќи сега е затишје, се ќе се знаело дури после изборите, изјави за НОВА жена од еден град во внатрешноста, која од разбирливи причини сакаше да остане анонимна.
Министерот за труд и социјала Диме Спасов денеска изјави дека 40 глуви луѓе добиле работа преку огласот на Македонски шуми.
-Јас сум многу задоволен затоа за можноста за 300 вработувања, а досега се вработени 40 глуви лица и сметам дека животот значително ќе им се подобри,изјави претседателот на Сојузот на глуви Васко Марков на денешната средба со министерот Спасов.
Токму вработувањето беше главната причина што некои од овие луѓе се откажаа од протестот на глувите велат дел од овие луѓе со кои контактираше НОВА. Тие три пати протестираа, бараа смена на претседателот на Сојузот на глувите Васко Марков, повеќе толкувачи и поголеми права.Тие велат дека многу луѓе се откажале од протестот бидејќи биле условувани дека„ доколку протестираат-нема да имаат право да учествуваат на огласот за работа“.
Во меѓувреме 300 глуви луѓе веќе го оствариле правото на месечна парична помош во висина од 4000 денари, соопштија од Министерството за труд и социјала. За да го остварат правото на парична помош барања поднеле околу 1000 луѓе кои се 100 проценти глуви.
– Во текот на наредните недели и месеци очекуваме да се зголеми бројот на реализирани барања, откако ќе се завршат прегледите и ќе се обезбеди комплетната документација, на секој предмет посебно. Ова право беше долгогодишно барање на Сојузот на глуви, кое сега стана реалност поради што сега веќе не разговараме за воведување на правото, туку за негово зголемување, изјави министерот Диме Спасов.
Во исто време бројот на толкувачи се зголеми на пет нови кои ја положиле обуката, со што бројот се зголеми на 17, а надлежните ветуваат дека ќе има 40 нови толкувачи. Глувите велат дека се незадоволни од работата на Сојузот, бидејќи според законот на секој од нив им следуваат по 30 часа годишно бесплатно толкување.
Но, ова не се почитува, ситуацијата е таква што глувите најчесто сами си ги плаќаат толкувачите кога имаат потреба да одат на суд, на лекар, во банка, велат нашите соговорници.