Министерството за надворешни работи е разочарано од Резолуцијата на Собранието на Република Северна Македонија донесена на 29 јули 2021 година и со жалење забележува дека овој чин доаѓа во време кога билатералниот дијалог меѓу Софија и Скопје, како резултат на постојаните напори, започна да преминува во попозитивна и поперспективна фаза, се наведува во реакцијата на бугарското МНР.
Оттаму соопштија дека Бугарија со нетрпение очекува да се објави резолуцијата со цел внимателно да се анализира нејзината содржина во однос на нејзината соодветност со Договорот за пријателство, добрососедство и соработка потпишан и ратификуван од Собранието, како и потенцијалното влијание на овој документ врз тековниот дијалог меѓу Скопје и Софија.
-За Бугарија би било целосно неприфатливо преку слични акти да се мотивира или оправдува неисполнувањето на Договорот за добрососедство и соработка од 2017 година, што е во спротивност со водечките принципи на меѓународното право, додаваат од Министерството за надворешни работи на Бугарија.
Како што пишуваат во реакцијата, единствениот правилен начин за изнаоѓање одржливи и заемно прифатливи решенија за тековните предизвици во билатералните односи е строго почитување на постигнатите договори и обврски, нивно ефективно и добронамерно исполнување, како и водење на искрен дијалог.
Претходно во текот на денот, претседателот на државата Стево Пендаровски, на брифинг со новинарите, оцени дека усвојувањето на Резолуцијата не би создало негативни импликации на внатрешен план, но воедно очекува текстот да предизивика негативни реакции од официјална Софија.