По предлог на ДОМ владата на денешната седница ја разреши директорката на Државниот инспекторат за животна средина, Ана Петровска и го назначи Сретен Стојковски за вршител на должноста, директор кој инаку доаѓа од Министерството за животна средина..
Ваквата одлука на партијата ДОМ која поминала и на Извршниот Комитет следува по повеќе поплаки од граѓани и од вработени во Инспекторатот за животна средина. Извори на НоваТВ од ДОМ брифираат дека Петровска не знаела или не можела да го менаџира процесот во институцијата со која раководела , што придонесло за нарушени меѓучовечки односи најмалку во три случаи.
Од друга страна на социјалните мрежи како и на веб страната на Инспекторатот за животна средина стигнувале многу поплаки од граѓани кои биле незадоволни од тоа како се процесуирале претставките упатени од нивна страна до инспекторатот.
На Петровска и се забележувало и тоа што за време од шест месеци , институцијата извршила 1100 надзори а биле поднесени 40 прекршочни и само две кривични пријави и тоа за Охрид, едната за корнењето на трските другата за шутот исфрлен во езерото и двете против непознат сторител, дополнува изворот од партијата ДОМ за НоваТВ.
На Петровска и се забележува и тоа што во анализа на Институтот за комуникациски студии било наведено дека не биле ефикасни инспекциските сектори за животна средина и не биле транспарентни.
Петровска во изјава за ДВ , вели и без функција ќе продолжи да се бори за животната средина и јавниот интерес.