ВМРО-ДПМНЕ го испрати говорот во Зрновце, на кандидатот на ВМРО-ДПМНЕ за Претседател на Република Македонија, Ѓорге Иванов:
Пред пет години ја добив Вашата доверба. Ја добив довербата на основа на програмата која Ви ја понудив. Денес сум тука да Ви кажам дека целата програма е реализирана, и повеќе од тоа. За тоа поднесов отчет. Велат дека е тоа првиот отчет на еден претседател во Република Македонија.
Овој пат доаѓам со нова програма. За нова доверба од Вас, за следните пет години. За овие пет години покажавме како се работи како тим. Сложно и единствено. Заедно со премиерот Груевски, заедно со министрите, со пратениците, со советниците, со градоначалниците. Како ја менуваме Македонија. Се сеќавам пред пет години со Влатко бевме тука и колку имаше незадоволни земјоделци. Имаше незадоволство од тоа што не беа откупени земјоделските производи, што патиштата беа напуштени, што селаните беа оставени сами на себе. Сами да се грижат за себе. Но, денес гледам колку многу нови патишта се направени. Денес гледам колку субвенции се поделени. Денес гледам колку има интерес за сите луѓе да ги почувствуваат промените во Македонија.
Така е кога ни расте економијата. Но за да расте економијата ни беа потребни и реформи, менување на закони, менување на амбиентот во Македонија за да дојдат странски инвеститори, но и да се враќаат нашите луѓе кои успеале во светот. Да доаѓаат, да отвораат нови работни места. Веќе сосема поинаква Македонија. Се гради автопат кон Штип, за цела источна Македонија да почувствува благодет. Се реновираат пругите низ Македонија, фабрики се градат низ Македонија. Во последниве години од 2006 година кога дојде овој млад тим на чело на Македонија заедно со Груевски, 120 илјади работни места се отворени во Македонија. 550 милиона евра се дадени за субвенции на земјоделието. Платите се зголемуваат, пензиите се зголемуваат. Е тоа е кога расте економијата. Кога расте економијата се расте, само едно опаѓа невработеноста. Кога дојде овој млад тим беа 39% невработени, сега е околу 28%. И уште да се намалува.
Само во индустриските зони што се отвараат, околи 7.000 граѓани веќе се вработија. До крајот на годината се очекува да бидат вкупно 14 илјади вработени луѓе само во зоните.
Неодамна бевме во Кавадарци. Ја видовме најголемата фабрика во Македонија. 4.000 луѓе работат во една фабрика. Е тоа е успешна Македонија. Така успева Македонија.
Доаѓаат странски инвестиции и во Вашиот крај. И во Кочани доаѓаат. Во Кочани ќе се отвораат фабрики. Доаѓаат во сите места инвестиции. Но тоа е кога сме создале амбиент во кој што секој може да дојде и да остварува профит. Тоа е кога Македонија по сите извештаи покажува просперитет и развој. Е тоа е резултат на тимска работа. Кога се работи заедно, кога се работи посветено за Македонија. Тогаш резултатите секаде можат да се видат. Тогаш имаме деца кои што ќе имаат радосно детство, родители кои се вработени, кои си ја наоѓаат својата среќа или во индустријата, или во земјоделието, тогаш имаме и луѓе со спокојна старост. Луѓе чии пензии не само што редовно доаѓаат, туку и редовно се зголемуваат.
Градоначалникот вели дека 25 улици се реконструирани во оваа година. Четири локални патишта во вредност од 180 илјади евра, исчистени се каналите во полето. Така се работи за граѓаните. Се она што го имаат граѓаните кажуваат, мене ми го кажуваат, го кажуваат на пратениците, го кажуваат на министрите. Сето тоа влегува во програмите кои се реализираат. И потоа се дава отчет. Дава отчет и градоначалникот, даваат отчет и министрите, и Владата, и јас дадов отчет. И затоа имаме чист образ, да дојдеме повторно пред Вас и да ја бараме довербата од Вас.
Изградена е и училишна спортска сала во училиштето „Синиша Стоилов“ со 187 ученици. Инвестиција од 23 милиони денари. Изградено е и повеќенаменско игралиште. Секаде нешто се гради, секаде нешто се создава. Така успева Македонија. Успева со дела. Успева со луѓе кои се посветени и си ја сакаат Македонија. Затоа што сите сме Македонија. Сите сме тие што даваме доверба на оние што ја водат Македонија. Македонија се сака со дела. Македонија се сака кога градите и придонесувате луѓето да бидат среќни. Да гледаме насмевки на луѓето, да гледаме задоволство, да гледаме дека секаде нешто се менува.
Се менува затоа што изборот ни е Македонија.
Се менува затоа што Македонија ни е пред се.
Затоа државата ни е пред се.
Да живее Зрновци, да живее Република Македонија