-Втор пат за десет дена доаѓам овде кај вас бидејќи вие сте изворот на демократијата и слободната мисла и убеден сум дека на 13-ти овој месец убави вести ќе стигнат од тука за сите нас, рече Стево Пендаровски во Вевчани.
Како го коментирате тоа што вашиот противкандидат оди на митинзи со цела Влада, прашаа жителите во Вевчани.
-Кандидатот на Груевски очигледно не го познава првиот член од Уставот што се однесува на надлежностите на претседателот на државата. Тој вели дека претседателот ја претставува државата и надвор и внатре, сам, одговори Пендаровски.
Тој на средбата истакна дека во земјава е потребна симбиоза помеѓу град и село, помеѓу старите и младите. Само на тој начин Македонија ќе оди напред и наместо да се споредува самата со себе, таа ќе се споредува со светот, истакна Пендаровски.
Вевчанци го прашаа Пендаровски што мисли тој за положбата на Република Македонија на меѓународен план.
-На меѓународен план никогаш не сме стоеле полошо. Пред неколку години го добивме канидатскиот статус за членка во Европската унија, а денес тие што тогаш и помогнаа на Македонија и ја признаа, сега ја заобиколуваат. Тоа е така бидејќи овде немаат соговорници.
Оваа Влада не знае да зборува за човекови слободи и права, за демократија, за економија, за напредок, рече претседателскиот кандидат Стево Пендаровски во Вевчани.