Граѓанската опција за Македонија преку соопштение информира дека кандидатот за претседател на партијата, проф. д-р Зоран Поповски, со граѓаните на скопските села Кондово, Долно Свиларе, Рашче и Шишево разговарал за “чувствителното прашање за сиромаштијата и невработеноста кои се најголемиот проблем на граѓаните”.
“Токму ова чувствително прашање треба да го актуелизира претседателот на Република Македонија како мегафон и во име на граѓаните на земјава”, вели ГРОМ.
ГРОМ известува дека “претпладнево кандидатот на ГРОМ, Поповски, се сретна со повеќе од стотина граѓани од овие периферни скопски населби и најнепосредно, низ искрен разговор, ги отвори овие прашања што ги мачат сите граѓани на Македонија.
Напладне, Поповски направи полчасовна обиколка на пазарчето Тафталиџе, каде што со производителите и продавачите размени мислење околу проблемите со кои се соочуваат пазарџиите и потребите што ги имаат околу покривањето на пазарчето.
Во попладневните часови Поповски посети стотина граѓани од Злокуќани, на улиците 22 и 3, каде на локалните жители им го чест Меѓународниот ден на Ромите и ги запозна со чекорите кои тој може да ги преземе како претседател на РМ во рамки на уставните ингеренции и надвор од нив за да им го подобри животот на сите граѓани, без оглед на нивната етничка и религиска припадност. Покрај тоа, тој оствари средби и со граѓани на Волково и на Ѓорче Петров”, јавува партијата.