Мисионери кои водат банка? Она што на прв поглед звучи неверојатно, веќе 50 години постои во Санкт Аугустин, кај Бон, и работи со прилично голем успех. Штајлер Банк е кредитен институт кој пред 50 години го основаа Штајлерските мисионери, кои во меѓувреме работат во 70 земји во светот.
Сите кои во оваа банка ќе отворат сметка, како што се наведува во брошурата на банката, можат да имаат мирна совест. Приходите од каматите муштериите може да ги донираат за редот, односно за неговите мисионерски или хуманитарни активности. И добивката од оваа „добра банка“ се влева во меѓународни хуманитарни проекти.
„Поимот ‘чесен трговец‘ нам ни е енормно важен“, вели директорот на банката Норберт Волф. Во време кога поради финансиската криза нагло се намали довербата на граѓаните во банкарите, Штајлер Банк делува како вистинско мало чудо. Оваа приватна банка работи сосема транспарентно. Тука нема трикови, како што се подароците за новите муштерии. Нема ниту премии за вработените кои во банката ќе доведат нов муштерија, како што тоа е вообичаено во банкарскиот свет.
Доверба во поинаквите банкариМорални принципи
Дејноста на сите фирми чии хартии од вредност Штајлер Банк ги нуди преку своите фондови, на некој начин се темелат врз еколошки, но и етички начела. Во фондот се наоѓаат хартии само на претпријатија кои задоволуваат строги критериуми. „На пример, гледаме и каква е политиката на тоа претпријатие кога станува збор за можноста на поврзување на кариерата и семејството или како фирмата се однесува кон трошењето енергија“, вели директорот Волф.
Списокот на критериуми кои Штајлер Банк ги наведува како предуслов за влез во некој фонд, е долг. Значи, нема претпријатија кои тргуваат со оружје, козметички фирми кои изведуваат обиди со животни или каква било фирма која на некој начин е поврзана со тутнската индустрија или производството на алкохолни пијалоци. А со оглед на тоа што се работи за банка која е во раце на Католичката црква, тука не можат да се најдат ниту хартии од вредност на фирми кои имаат каква било врска со порнографија или абортус.
Нема совршени
Така звучи теоријата, но во пракса е многу тешко да се контролира секој вид на поврзаност на едно претпријатие. Освен тоа, за воопшто да влезат во портфељот на банката, фирмите мора да остваруваат и каков-таков профит, а тоа не е секогаш можно преку принципите кои ги брани црквата. „Апсолутно одржливо претпријатие и претпријатие кое во целост би ги задоволило нашите критериуми – едноставно нема!“, признава и раководството на банката. Затоа Штајлер Банк се концентрира на одделни бранши кои се најблиски до идеалот на „совршено претпријатие“. Но и самите банкари, кога е во прашање сопанството, признаваат дека е невозможно да се оди само по принципот на етиката. Како инаку да се објасни тоа што во портфељот се наоѓаат и хартии од вредност на БМВ, чии автомобили поради натпросечната потрошувачка им се трн в око на еколозите?
Сторијата е превземена од сервисот на македонски јазик на Дојче Веле