Прелиминарната оценка на Граѓанската асоцијација МОСТ е дека гласањето за претседателските избори на 13-ти април помина во мирна атмосфера со изолирани тензични ситуации и релативно висока излезност на граѓаните.
– Сепак, фактот што видливото мастило лесно се отстрануваше, беше причина за поголем број издржани реакции од страна на јавноста и гласачите. Ваквата појава несомнено имаше влијание врз довербата на гласачите во изборниот процес, вели извршниот директор на МОСТ, Дарко Алексов.
Покрај мастилото, како индиректен притисок врз гласачите, набљудувачите на МОСТ посочуваат дека на одредени избирачки места, избирачките одбори ги читале имињата на гласачите на глас, а забележани се и случаи на евидентирање на гласачите.
Бројот на гласачи кои се пријавиле за гласањето еден ден пред 13.април изнесува 7.386, што според МОСТ претставува нереално висока бројка.
– Што се однесува до текот на овој вид гласање, генералната забелешка е дека во поголемиот дел од случаите не била почитувана тајноста на гласањето и ИО не ја познавале доволно процедурата за спроведување на ова гласање, соопшти Алексов.
Тој напомена дека од набљудувањето кое започна на 1.февруари, се водело и предвремена кампања, посочувајќи го примерот со кандидатот за претседател на ВМРО-ДПМНЕ, Ѓорѓе Иванов.
МОСТ забележува и дека во кампњатите, некои кандидати употребувале реторика својсветна за парламентарните избори. Односно, ветувањето на изградба на патишта, делење субвенции, кои се вон надлежност на претседателската функција.
Во однос на работата на Државната изборна комисија, забележана е намалена транспарентност при нивната работа, односно 14 од вкупно 38 седници биле одржани без присуство на медиумите и овластените набљудувачи, а во текот на работењето, се забележува дека членовите на ДИК, расправите ги употребувале за партиски пресметки.
Тој ги повтори резултатите добиени од ПВТ програмата за паралелно пребројување на гласовите.
Одѕивот на гласачките места бил 49,64%. Процентот на неважечки ливчиња пак 2,78%. Од важечките ливчиња, гласовите за претседателските кандидати се распределени на следниот начин:
1. Ѓорге Иванов – 53,14%
2. Илјаз Халими – 4,5%
3. Стево Пендаровски – 38,78%
4. Зоран Поповски – 3,58%
Изборниот ден од првиот круг од изборите за претседател на Македонија, МОСТ го следеше со 580 набљудувачи, притоа покривајќи над 15% од вкупниот број на избирачки места.