Различните податоци за бројот на запишани гласачи во избирачките списоци на Државната изборна комисија (ДИК) и Општинската изборна комисија (ОИК) од Битола, внесоа забуна како кај граѓаните, така и кај новинарските екипи кои ги следеа вчерашните избори за претседател на Република Македонија.
На избирачкиот список на ОИК-Битола, запишани се 82.588 гласачи, додека пак во списокот на ДИК, право на глас имаат 76.857 жители на Општина Битола. Невообичаено големата разлика од 5.731 избирачи меѓу едниот и другиот список, се обиде да ја објасни претседателот на ОИК-Битола, Зоран Насев.
Меѓутоа, неговото образложение дека разликата се должела на тоа што дел од гласачите од Општина Битола се наоѓале во казненопоправни домови и гласале во други општини, дополнително ја искомпликува ситуацијата. Логичното прашање кое се наметна после изјавата на Насев, беше како е можно толку голема бројка на граѓани на Општина Битола, што претставува речиси 7% од вкупното население на Општината, во моментов да се наоѓаат во казненопоправните домови?
Одговор побаравме во опозицискиот регионален изборен штаб на ИЕ 5. Според нив, несовпаѓањето на бројот на запишани избирачи во избирачките списоци на ДИК и ОИК, се должи на тоа што во избирачкиот список на ОИК се внесени и лицата кои се со постојано место на живеење во странство. Оттаму рекоа дека ова е само уште една потврда дека нашата држава има неопходна потреба од спроведување на попис на населението.
Денес преку прес конференција се огласи носителот на кандидатската листа за пратеници од ИЕ 5, Васко Ковачевски, кој рече дека на вчерашното гласање граѓаните јасно ја покажале желбата за промени.
„И покрај сите злоупотреби, неправилности и нарушувања на изборниот процес, како и заканите, уцените и притисоците, јасно е дека Битола се буди. Разликата на гласовите помеѓу власта и опозицијата од претходните избори, двојно е намалена. Сепак, факт е дека вчера волјата на народот за промени беше брутално угушена. Но ние не се предаваме. Во наредните две недели опозицијата, заедно со граѓаните, ќе застане на браникот на слободата и демократијата“, рече Ковачевски.