Во Скопје власта ја губи поддршката. Главниот град покажа дека сака промени. Да го пренесеме тоа насекаде, да го покаже тоа цела Македонија. Единствено народот може да ги донесе промените, кои толку жедно ги бара, повика заменик претседателката на СДСМ, Радмила Шекеринска во Лисиче, соопштува СДСМ.
-Шекеринска влегувајќи во дуќаните и разговарајќи со граѓаните ја презентираше програмата на СДСМ за враќање на средната класа во која акцент е ставен и на развивање на малите и средни претпријатија.
Работиме за да ги платиме трошоците, за две недели три пати кај нас влезе инспекција. Ние постојано сме на удар од власта. Никој кој работи во приватниот сектор не ја поддржува власта поради нејзиниот однос кон нашите бизниси и високите казни кои таа ги наметнува за да ја полни државната каса, се жалеа дуќанџиите.
Граѓаните во разговорите со Шекеринска ги споделуваа и своите искуства од изборите и начинот на кој, како што велат, власта ги притиска гласачите.
Нашиот глас со пари не може да се купи. Ние милостина ниту бараме, ниту сакаме, сите ние сакаме подобар живот, чесно да може да си работиме и да си заработиме, вака една граѓанка коментираше пред Шекеринска.
Жителите на Пинтија кои денеска се сретнаа со Радмила Шекеринска ги споделуваа маките со кои секојдневно се соочуваат. Револтирано коментираа дека власта ги потроши парите за споменици кои не ги решаваат нивните проблеми.
Ние предвидуваме работодавачот да продолжи да плаќа персонален данок на државата, но државата на крајот од годината тие пари да ги врати кај работникот. Со враќањето на ДДВ и персоналниот данок назад кај работниците, семејствата ќе добијат дополнителен приход.
Целта на нашата програма е парите да ги вратиме назад кон граѓаните и нивните семејства, рече Шекеринска.
Таа денеска беше и во посета на Кисела Вода каде оствари повеќе средби со граѓаните од оваа населба.
За зградата на улицата „Михаил Чаков“, за која се алармираше дека има гласачи на непостоечки адреси, граѓаните зачудено коментираа дека од зграда со три влеза се претворила во имагинарна зграда со шест влеза, во која се регистрирани гласачи кои никогаш не ги виделе, соопштува СДСМ.