Дезинформациите доведоа до зголемен број млади, невакцинирани пациенти со Ковид-19 во болниците, вели еден од врвните консултанти за критична нега во Велс пишува Би-Би-Си.
Д-р Ејми Џонс рече дека персоналот во болницата се чувствува „деморализирано“ кога повторно гледа како вирусот ги полни одделенијата и одделите за интензивна нега.
„Ковид никаде не замина“, вели консултантот во Универзитетската болница во Гранџ во Велс, каде расте потребата за хоспитализации.
Стапката на нови случаи во Велс е највисока од јануари, а бројките од Институтот за јавно здравје во Велс покажуваат дека се активни 386,6 случаи на 100,000 луѓе во последните седум дена.
Но, хоспитализациите се многу пониски поради вакцинацијата, а новите случаи биле очекувани поради олеснувањето на рестрикциите.
Бројот на пациенти кои се лекуваат во ковид одделенијата и се на респиратор се зголеми, на 40, од кои 13 во северен Велс, за разлика од петокот минатата недела, кога оваа бројка беше 31 пациент.
Ова е највисока дневна бројка од 4 март, но сепак останува многу помала отколку од пикот на вториот бран.
Во петокот, 328 лица се лекуваа од Ковид-19 во велшките болнички кревети, што е најголем број од април, а растот е за 35% за разлика од претходната недела.
Д-р Џонс, која работи во здравствениот одбор на Универзитетот Анеурин Беван во југоисточен Велс, рече дека одделите за итни случаи преживеале „многу понапорен викенд после долго време“.
„Ги третираме претежно невакцинираните луѓе и голем број од нив се луѓе во 20-тите и 30-тите години, при што мал број и до 16 години бараат болничка нега за Ковид“, вели таа.
Случаите на заразени кои се помлади од 25 години продолжуваат да се зголемуваат секаде, освен во две од 22 области на Велс, со големи зголемувања во Свонси, Вејл и Пемброкшир.
Пемброкшир сега има највисока стапка на случаи на млади од 25 години – 815,3 на 100.000, во споредба со просекот од Велс од 500.1 на 100.000 жители.
Вакцинацијата направи огромна разлика во случаите на кои им е потребно болничко лекување, кажа д-р Џонс, додавајќи дека „ние имаме пациенти кои се многу лошо во моментов кои не се вакцинирале, а сега не сакаат ништо повеќе од тоа да го вратат времето назад и да примат вакцина“.
„Персоналот се чувствува прилично деморализирано поради тоа што вирусот повторно ги полни нивните одделенија, особено кога голем број болнички случаи можеа да бидат спречени со вакцинација. Секогаш е болно да се третираат пациенти кога тоа можело да се избегне, но овојпат се чувствувам поинаку, бидејќи имаше толку многу дезинформации што им направија луѓето да не знаат кому да веруваат и во што да веруваат“.
„Прашајте го секој здравствен работник од првата линија и тој ќе ви каже дека вакцинацијата е она што прави разлика во третирањето на пациентите во моментот“.
Таа додаде дека вирусот во моментов е „насекаде“ и рече дека луѓето треба да продолжат да преземаат мерки на претпазливост и да бидат разумни, без разлика дали се вакцинирани или не.
Пациентите со Ковид-19 сочинуваат 3,9% од пациентите во болницата во Велс.