Денеска се одбележува Денот на планетата Земја. Пораката од Обединетите нации е дека мора да се инвестира во обновливи извори на енергија, во реновирање на градовите и да се почне со решавање на климатската криза.
– Повеќе од половина од светската популација, денес живее во градовите. Со тоа што бројката во урбаните средини се зголемува, а последиците од климатските промени се влошуваат, нашите градови мора да еволуираат, стои во пораката на ОН на сајтот.
Во својата порака по повод Денот на Земјата, генералниот секретар Бан Ки-мун вели:
– Апелирам до сите луѓе насекдае околу светот да го кренат гласот. Да зборуваат во името на оваа планета, нашиот единствен дом. Да се грижиме за неа за таа да може да се грижи за нас.
Тој истакнува дека со порастот на популацијата, трошоците на ресурсите се неодржливи и дека затоа мораме да ги промениме ставови и однесувањата.
Генералниот секретар наведува дека на 23.септември ќе свика самит за климата во Њујорк, и ги повика шефовите на државите и владите како и лидерите на приватниот сектор и граѓанските здруженија да покажат иницијатива и да создадат односи кои ќе помогнат во изградбата на одржлива иднина.
Денот на планетата Земја е годишен настан кој се слави на 22 април, датум на кој се одржуваат настани насекаде низ светот за да се демонстрира поддршка за заштита на животната средина. За првпат се славеше во 1970 година, а денес се слави во 192 земји ширум светот.