Заменик-претседателката на СДСМ, Радмила Шекеринска во Кичево и Ресен порача дека со моќта на секој глас ќе дојде до промени во државата.
Таа ги презентираше мерките од програмата на СДСМ кои ќе ги вратат парите назад кон граѓаните, кои ќе обезбедат враќање на ДДВ, зголемување на минималната плата и подобар стандард.
Грижата за домашните трошоци на граѓаните е неизоставен дел од Програмата, укинувањето на радиодифузната такса за социјалните случаи и нејзино намалување за сите граѓани, враќање на евтината струја и викенд тарифата со која граѓаните ќе имаат евтина струја и во сабота и во недела се само дел од мерките на кои се осврна Шеќеринска.
– Со овие мерки буџетот на граѓаните значително ќе се зголеми. Граѓаните се интересираа за мерките во Програмата кои се однесуваат на наоѓалиштата на јаглен бидејќи како што рекоа, ако го нема ТЕЦ Осломеј ќе го нема ниту Кичево. Идната влада на СДСМ ќе го отвори јагленокопот Топовјани, во околината на ТЕЦ Осломеј, ќе го модернизира ТЕЦ Осломеј и ќе го продолжи неговиот производен век – рече Шекеринска.
Потпретседателката на СДСМ во своето обраќање пред кичевчани истакна дека граѓаните не сакаат да живеат во држава под кирија, дека не сакаат да живеат во држава во која конците ги влече криминалот.
– Македонија сака промени – порача Шекеринска.
Таа денеска беше и во посета на Ресен каде оствари бројни средби со граѓаните. Жителите во ресенско ги споделуваа со неа проблемите кои се повеќе им ја отежнуваат живеачката.
– Зад параванот сте сами. Никој не е сопственик на вашиот глас, со вашиот глас оваа власт ќе замине во историјата. На овие избори да ја испратиме пораката за нов претседател кој ќе обединува наместо да дели и за новата власт која ќе ја врати средната класа. Со гласање ќе се обезбедат промени во државата, со моќта на секој глас – порача Шекеринска.