Сочувство до семејствата на настраданите во сообраќајната несреќа изразија градоначалникот на Дебар Хекуран Дука и повереникот за надлежностите на градоначалник на општина Маврово и Ростуше, Медат Куртовски кои на повредените им посакаа брзо закрепнување.
Во објавата на официјалната страна на Фејсбук, Дука потврдува дека четворица од настраданите се жители на оваа општина.
-Со голема тага и длабока болка ја примивме кобната вест за жртвите од трагичната несреќа во Бугарија, особено кога дознавме дека меѓу нив има и 4 наши сограѓани-дебрани. Длабока е раната предизвикана од оваа трагедија во која има и многу деца, а повеќето се млади. Ја споделуваме болката со погодените и нивните семејства. Го молиме семилостивиот Бог да ги помилува загинатите да им даде божји рај и да даде брзо закрепнување на повредените, напиша Дука на Фејсбук.
И Куртовски изразува искрено и длабоко сочувство и солидарност со семејствата на загинатите, а на повредените им посакува брзо закрепнување.
-Трагичен ден за нашата држава. Болката и тагата се огромни. Сочувство за настраданите. Трпение за семејствата на починатите. Брзо закрепнување на преживеаните, напиша Куртовски.