Четири автобуси на „Беса транс“ тргнале од Турција, но тие границата со Бугарија ја минале границата во различно време, бидејќи дел од патниците инсистирале да одат на шопинг, а токму ова е причината за тоа зошто конвојот се раздвоил.
Обвинителката Вилма Русковска во изјава за Телма ТВ кажа дел од деталите кои на обвинителите за несреќата им ги рекол сопственикот на „Беса транс“, Беким Хаџиу. Токму тој, вели Русковска, бил еден од возачите.
– Всушност сопственикот бил и како втор возач. Кажа дека овој автобус возел позади нив. Значи тие веќе биле стигнати на граничниот премин во Бугарија, по излегување од Турција, а овие биле еден или два автобуси позади нив. Тогаш ми кажа дека тој и сопругата биле во тој вториот автобус, додека пак во четвртиот биле неговите деца, рече Русковска.
Таа опиша дека Хаџиу бил видно вознемирен и потресен.
– Го прашав дали носеле резервни канти со гориво, вика нема шанси тоа да се случило, рече Русковска која додава и дека го прашала за патниците дали е можно тие да носеле нешто, но сопственикот бил дециден дека не се случило тоа.
Во автобуската несреќа во Бугарија што се случи на автопатот „Струма“ на 23 ноември загинаа 45 лица, а седуммина кои беа повредени, беа хоспитализирани во софиската болница.