Лекар од Клиниката за гастроентерохепатологија бил претепан од син на пациентка, по што со потрес на мозокот и повреди по лицето и главата завршил на Хирушките клиники, дознава НОВА од извори во Ургентниот центар. Настанот се случил завчера попладне на дежурство додека лекарот пунктирал пациентка со малигно заболување на која требало да и се извади вода од стомакот. Во исто време работел и со друг тежок пациент со крварење.
Во еден момент пациентката ја измрдала раката, по што се извадила иглата. Докторот повторно ја наместил и го замолил семејството кое било бројно, да излезат од болничката соба за да не сметаат и тргнал по ходникот. Тогаш синот на пациентката на возраст од 25 години, го нападнал од зад грб, почнал да го мава со тупаници по главата и да го пцуе на национална основа, лекарот кој бил Албанец.
По ова дошло обезбедувањето, а лекарот итно бил однесен во Ургентниот центар каде што му била укажана лекарска помош и биле направени снимања на главата.
Случајот бил пријавен во полиција и во Лекарската комора. Веднаш биле известени двајцата директори на клиниката кои забраниле да се даваат било какви информации во јавноста. Со тоа обидот на лекарите кои сакале да одржат прес конференција за настанот завршил во вода.
НОВА утринава го побара директорот Ненад Јоксимовиќ, но тој не одговори на повиците на неговиот службен телефон.
Во Лекарската комора потврдија дека синоќа кај нив бил пријавен случајот.
-Да, точно е, вчера пријавен случајот кај нас. Ќе бараме заштита и тоа да се вметне во законската регулатива. За Конкретниот случај, откако утре ќе се состави Владата ќе бараме прием кај министерот за здравство за да изнајде начин лекарите да добијат заштита во болниците, изјави за НОВА Кочо Чакаларовски претседател на Лекарската комора.
Ова не прв случај на напад на лекар на оваа клиника. Минатата година од пациент беше нападната лекарка која со денови подоцна не можеше да заздрави од траумите и стресот. И тогаш директорите не се огласија за нападот.
Лекари од скопските клиники на НОВА раскажуваат како секојдневно во амбулантите доаѓаат пациенти кои немаат закажан преглед , без упат и бараат да бидат примени , при што се заканувале дека ќе пријават во Министерство за здравство доколку не бидат прегледани или не бидат прочитани резултатите. Тие велат дека во исто време по ходниците шетаат инспектори испратени од Министерството и Фондот кои симулираат дека се пациенти и регистрираат дали има незадоволни пациенти.