Александар Мачевски, сточарот од село Робово, кого Анима Мунди го обвини дека малтретира животно, врз основа на снимено видео кое сам го поставил на својата фејсбук страна , попладнево преку ФБ потврди дека за утре примил покана да се појави на распит во полициска станица.
Притоа Мачевски најавува дека ќе покрене постапка против Анима Мунди кое му го нарушило угледот со тоа што го претставило за насилник, а тој како што тврди само спроведувал еден традиционален обичај кога се продаваат јагнињата, кој обичај неговото семејство го практикувало од поколение на поколение. Самиот вели одгледува овци и крави од 2006 година и тоа му е семеен бизнис со кој го одгледувал 10 членото семејство.
Во зависност од развојот на ситуацијата, тој најави протести во Скопје пред Владата за што имал поддршка од сточарскиот еснаф од Малешевијата но и од другите краишта на земјава.
Како што е веќе познато здружението за заштита на животни Анима Мунди вчера објави видео снимка на која според нив група луѓе меѓу кои и инспектор од Берово се изживуваат врз животно. Побараа итно покренување постапка од страна на Агенцијата за храна и ветеринарство против беровскиот инспектор и трајно отстранување од вршењето на службена должност во институцијата.
Агенцијата за храна и ветеринарство ја осуди и се оградува од постапката на инспекторот од подрачната единица на АХВ во Берово.
Инспекторот бил повикан од сточарот Мачевски како гостин на адетот на кој јагнето се ставало на маса и се пеела песната „Изгубеното јагне“ кое потоа се враќало кај мајкаму .
Со реакција за случајот се јави министерот за земјоделство Љупчо Николовски кој рече е згрозен од монструозниот чин на инспекторот за благосостојба на животните во подрачната единица Берово, на Агенцијата за храна и ветеринарство, и најави итно постапување и преземање на сите дисциплински мерки од страна на АХВ.
(М.Т.)