Претседателот на Владата на Северна Македонија, Димитар Ковачевски ги продолжи активностите на Минхенската безбедносна конференција.
Ковачевски на маргините на настанот остварил средба со претставникот на ЕУ за Западен Балкан, Мирослав Лајчак.
„На средбата на која присуствуваше и заменик-претседателот во Владата задолжен за европски прашања Бојан Маричиќ, премиерот Ковачевски го запозна Лајчак со заедничките активности со премиерот на Република Бугарија Кирил Петков за интензивирање на билатералната соработка и за работата на петте работни групи за економија, инфраструктура, култура, ЕУ интеграција и историја коишто имаат задача да изготват патоказ за спроведување на Договорот за пријателство“, информираа од Владата.
Претставникот на ЕУ, Мирослав Лајчак упатил силна поддршка за интеграцијата на Северна Македонија во ЕУ и ја оценил нашата земја како доверлив партнер на Унијата. Лајчак изразил и задоволство од досегашните заложби и ги оценил како значаен придонес кон конечната одлука за усвојувањето на Преговарачката рамка и за закажувањето на првата Меѓувладина конференција во мандатот на Република Франција како претседавач со Европскиот совет.
На средбата станало збор и за унапредувањето на регионалната соработка меѓу земјите од Западен Балкан, меѓу што и за охрабрувачкиот процес „Отворен Балкан“.