Претседателот на САД Барак Обама имал итен телефонски разговор со израелскиот премиер Бенјамин Нетанјаху, во кој настојчиво го повикал да ја спречи смртта на повеќе палестински цивили, пренесе АФП.
-САД го поддржуваат правото на Израел да се брани од непријателски проектили, но истовремено сме многу загрижени од растечкиот број невини жртви и натамошна ескалација на конфликтот во Газа, рекол Обама, откако еврејската држава доцна во четвртокот започна копнена офанзива против групата Хамас .
Во меѓувреме, во 12-тиот ден на израелско-палестинските судири, бројот на убиените Палестинци се зголеми од 274 на 337.
Повредените се блиску 2 400 луѓе, а бројката на оние кои побарале заштита од ОН е над 50 000. Но, и покрај големата офанзива владата на Нетанјаху не успева да ја запре ракетната канонада на својата територија. Досега таа е причинител на смртта на тројца Израелци.
Офанзивата сепак ја зафати речиси цела Газа.
Началникот на Генералштабот ген. Бени Ганц објасни само дека скалата на операцијата се зголемува, бидејќи палестински борци успеале да упаднат на израелска територија и планирале да експлодираат магаре, натоварено со ескплозиви.
Во регионот синоќа се очекуваше да пристигне генералниот секретар на ОН Бан Ки Мун, за да се обиде да ги убеди двете завојувани страни да го прифатат предложеното примирје од Египет.
Неговите напори беа поткопани од турскиот премиер Реџеп Ердоган, кој повика Палестинците да не ја прифаќаат иницијативата на египетскиот претседател Сиси, нарекувајќи го тиранин.